El aýmaǵyna bıdaı ákelýge tyıym salynady
ASTANA. KAZINFORM — Aýyl sharýashylyǵy mınıstrligi elimizdiń aýmaǵyna avtomobıl, sý jáne temirjol kóligimen bıdaı ákelýge 6 aıǵa tyıym salmaq. Atalǵan vedomstvo basshysynyń buıryq jobasy ashyq normatıvtik-aktiler portalynda jarııalandy.
— Úshinshi elderden jáne Eýrazııalyq ekonomıkalyq odaq elderinen Qazaqstan Respýblıkasynyń aýmaǵyna qus sharýashylyǵy jáne astyq óńdeý kásiporyndarynyń, lıtsenzııalanǵan elevatorlardyń, «Azyq-túlik kelisimshart korporatsııasy» ulttyq kompanııasy» aktsıonerlik qoǵamynyń mekenjaıyna temirjol kóligimen bıdaı ákelýdi qospaǵanda, avtomobıl, sý jáne temirjol kóligimen bıdaıdy (Eýrazııalyq ekonomıkalyq odaqtyń syrtqy ekonomıkalyq qyzmetiniń taýar nomenklatýrasynyń kody: 1001) ákelýge alty aı merzimge tyıym salý engizilsin, — delingen buıryq jobasynda.
Qujatqa sáıkes, qus sharýashylyǵy jáne astyq óńdeý kásiporyndarynyń mekenjaıyna ákelingen bıdaı ishki jáne syrtqy naryqtarda ótkizilmeýi (satylmaýy) tıis. Tyıym salý Qazaqstan Respýblıkasynyń aýmaǵyna temirjol tranzıttik tasymaldary sheńberinde ákelinetin bıdaıǵa, sondaı-aq olardyń Qazaqstan Respýblıkasynyń aýmaǵy arqyly Eýrazııalyq ekonomıkalyq odaqqa múshe bir memlekettiń aýmaǵynan Eýrazııalyq ekonomıkalyq odaqqa múshe basqa memlekettiń aýmaǵyna ornyn aýystyrýǵa qoldanylmaıdy.
Otandyq óndirýshilerdi qoldaý jáne ónimniń turaqty ótkizilýin qamtamasyz etý maqsatynda ázirlengen buıryq jobasy 1 shildege deıin qoǵamdyq talqylaýǵa shyǵarylyp otyr.
Aıta keteıik, «Qazaqstan temir joly» UK» AQ málimetterine sáıkes, 2025 jyldyń qyrkúıeginen 2026 jyldyń mamyryna deıingi kezeńde astyq pen undy eksporttaý astyq ekvıvalentinde 12,2 mln tonnaǵa jetti.
