«Elarnada» «Bajalar» jańa komedııalyq telehıkaıa kórsetiledi. VIDEO
ASTANA. 12 qarasha. QazAqparat - Otandyq telehıkaıalardyń qatary taǵy bir jańa týyndymen tolyǵatyn boldy. 14 qarashadan bastap "El arnada" 16 bólimnen turatyn «Bajalar» atty komedııalyq janrdaǵy jańa telehıkaıa bastalady. Bul týraly telearnanyń baspasóz qyzmeti habarlady.
Baja - týystyq ataýǵa jatatyn uǵym. Naqtyraq aıtsaq, apaly-sińlili nemese týysqan qyzdarǵa úılengen jigitter bir-birine baja bolady. Bajalar arasynda ózara týystyq baılanys bolmasa da, kez kelgen otbasynda erekshe yqylasqa bólenedi. Olardyń óz qyr-syrlary, eshkimge aıtylmaıtyn qupııalary, oǵan qosa tek ózderine tán ázil-qaljyńy bar. Nazarlaryńyzǵa usynylatyn jańa toptama úsh baja, úsh dostyń hıkaıalary jaıly bolmaq.
Atalymy aıtyp turǵandaı, telehıkaıadaǵy oqıǵalar qazaqtyń týystyq qarym-qatynasyndaǵy bajalardyń ómiri týraly bolmaq. «Bul buryn-sońdy qazaq kınosynda qozǵalmaǵan taqyryp. Sondyqtan, kórermenderdi qyzyqtyrady degen oıdamyz», - deıdi telehıkaıa prodıýseri Aqylbek Dosjanov.
Qazaqy kórermenderdiń janyna jaqyn bolatyn bul telehıkaıanyń ereksheligi - qarapaıym otbasyna bajalardyń kelýi. Olardyń arasyndaǵy týystyq qarym-qatynastardyń jańa qyrlaryn ashýǵa sebep bolatyn qyzyqty oqıǵalar, jarasymdy ázildermen tańǵaldyryp qana qoımaı, belgili bir turmystyq máselelerdiń sheshilý joldaryn shynaıy kúlki syılaı otyryp, bizge jetkizetin bolady.
Shyǵarmashylyq toptyń músheleri komedııa janryna tán birneshe týyndylardy dúnıege ákelip úlgerdi. Olar «VÝZery», «Aınalaıyn», «Úı bolý qıyn» serıaldary, sondaı-aq «Mássaǵan», «Dý Qol Shokolad», «Bolshaıa Raznıtsa -Kazahstan» sekildi ázilge toly shoý-baǵdarlamalaryn jasady. Sonymen qatar, aıta ketetin nárse, bul shyǵarmashylyq top tek óz elimiz ǵana emes, oǵan qosa reseılik «Shest kadrov», «Papıny dochkı», «Igrýshkı», «Schastlıvy vmeste», «Razvod po-rýsskı» sııaqty belgili serıaldardyń stsenarııin jazýymen de aınalysqan.
«Bajalar» telehıkaıasynyń basty rólderinde: Qadyrǵazy Qýandyqov, Raıhan Qalıoldına, Aınur Іlııasova, Erbol Sadyrbaev, Baqyt Kenebaı, Qýanysh Turdalın, Alııa Telebarısova, Qýanysh Kerimqulov jáne t.b.
Eki jyl New York Film Academy-de bilimin shyńdap kelgen Asqar Bısembın jobaǵa Los-Anjelesten arnaıy qoıýshy-operator Gonzalo Dıdjenıony shaqyrdy.
Bul jańa sıtkomdy «B.A.S. production» shyǵarmashylyq toby usynady.
Joba jáne stsenarıı avtorlary: Marat Oralǵazın, Rústem Omarov, Asqar Bısembın.
Prodıýseri - Aqylbek Dosjanov.
"Bajalar" telehıkaıasynyń saýndtregi. "Araı" toby
Telehıkaıanyń tızeri
