«Elarna» kórermenderin tanymal tulǵalardyń týǵan ólkelerine sapar shegýge shaqyrady
ASTANA. 17 mamyr. QazAqparat - 19 mamyr kúni, saǵat 21.50-de «El arna» telearnasy kórermenine «Týǵan ólke» jobasyn usynady. Baǵdarlamanyń alǵashqy keıipkeri «Nur-Muqasan» tobynyń múshesi Muqasan Shahzadaev. Ánshi joba barysynda týǵan jerine sapar shegip, ótken kún, balalyq shaǵymen qaýyshty.
Mundaı tamasha múmkindikke elimizge tanymal birqatar azamattar men azamatshalar, atap aıtar bolsaq Murat Ábenov, Maqpal Isabekova, Aıgúl Múkeı, Tursynbek Qabatov, Beıbit Qorǵan, Qydyráli Bolmanov pen Rınat Zaıtovtar ıe boldy.
Kóptegen talanttardy týǵyzǵan ulanǵaıyr qazaq eliniń ár qyry san myńdaǵan tarıhty boıyna saqtap, mıllıondaǵan adamdardyń taǵdyrynyń kýási bolyp keledi.
Baǵdarlamanyń bas keıipkerleri týǵan jerlerine sapar shegip, alǵash tulǵa retinde qalyptasa bastaǵan qutty mekenderine qaıta oralady. Qazirgi ómirdiń shynaıylyǵy men bar sulýlyǵy jobanyń bas keıipkerleriniń kózimen beriledi. Joba arqyly kórermenderder juldyzdarymyzdyń ómirimen, kúndelikti turmys-tirshiligimen ótene jaqyn tanysa alady.
«Joba arqyly Patrıottyq rýhty oıatqymyz keledi, - deıdi joba prodıýseri Ashat Sadyrbaı. - 2011 jyly alǵash kórsetilgen baǵdarlama kórermender arasynda qoldaý taýyp, úlken suranysqa ıe bolǵandyqtan jobany qaıta jańǵyrtýǵa bel baıladyq. Bul baǵdarlama belgili jetistikterdi baǵyndyryp, bıik shyńdardan kóringen tulǵalar úshin ómir kezeńderin qaıta jańǵyrtqan týǵan jerimen qaıta qaýyshýyna úlken múmkindik berse, aýyl turǵyndarynyń tanymal janmen kezdesýi jańa jetistikterge, bıik múmkindikterge talpynýǵa qanattandyrary sózsiz. Biz 16 baǵdarlama arqyly 16 keıipkermen, 16 tańǵajaıyp oqıǵamen jáne 16 erekshe jerlermen tanystyrýǵa tyrysamyz. Baǵdarlama áserli bolyp shyǵýy úshin realıtı-shoýdyń elementterin paıdalanýǵa tyrystyq. Máselen, keıipkerdiń qolyna beınekamera men fotoapparat ustattyq. Bul keıipkerlerimizge týǵan ólkesin ózderinshe tanystyrýǵa múmkindik berý maqsatynda jasalyndy. Byltyrǵy baǵdarlamada keıipkerler jaıly kóbine úshinshi tulǵalar syr shertse, endi bas qaharman óz jaıynda ózi baıandaıtyn bolady. Emotsııaǵa toly kórinister de jeterlik. Túsirilim kezinde «MuzART» tobynyń múshesi Sáken Maıǵazıev birneshe ret qaıtara túsine kirgen týǵan úıin kórip, kózine jas alǵan edi. Mundaı shynaıy sátter barsha kórermenderdi beı-jaı qaldyrmasy anyq».
