El-jurt Elbasynyń durys sheshim qabyldaıtynyna senip edi, senim aldaǵan joq - Z.Muqanbetqalıeva

Elbasy Nursultan Nazar­baevtyń áıelderdiń zeınetkerlikke shyǵý jasyn uzartýǵa baılanysty úndeýin tyńdap, kúpti kóńilimizdi ornyqtyra tústik, dep jazady «Egemen Qazaqstan» gazetinde Atyraý oblysynan «Kúmis alqaly» ana Zarıfa Muqanbetqalıeva. - Óıtkeni, Prezıdenttiń qol qoıýyna usynylǵan jańa zań jobasynda áıelderdiń zeınet jasyn 2014 jyldan bastap 6 aı qosý arqyly birtindep 63 jasqa jetkizý kózdelgen edi. Árıne, bul eldiń ekonomıkalyq, qarjylyq ahýalyn qıyndatpaý úshin mańyzdy bolar, alaıda, áıel-analardyń kópshiligi jańa zań jobasynyń túpki mánin túsine qoımaǵany anyq. Onyń ústine aýyldyq jerlerde turatyn áıelderdiń zeınetaqy qorynda jınaqtalǵan qarjysy da mardymsyz ekeni daýsyz. Demek, jańa zańdy el ishinde túsindirýde, qol­da­nysqa engizilý merzimin belgileýde bir shıkiliktiń baryn ishimiz sezip edi.

Mine, osyndaı sebepter analardyń alańdaýshylyǵyn týdyryp qana qoımaı, tipti keıbiriniń ókpe-renishke boı aldyrýyna túrtki boldy. Analardyń erteńine alańdaǵan osyndaı qıyn sátinde el-jurt Elbasynyń durys sheshim qabyldaıtynyna senip edi. Sol senim aldaǵan joq.

Nursultan Nazarbaev jańa zańdy álde de talqylap, jetildire túsý úshin Parlamentke qaı­­tarǵanyn teledıdardan tyńdadyq. So­nymen birge, áıel­derdiń zeı­net jasyn uzartýdy zań jobasynda kórsetilgendeı 2014 jyldan emes, 2018 jyldan engizýdi usynýynyń analar úshin mańyzy zor. Sebebi, Elbasy usyn­ǵan merzimge deıin keı analardyń zeı­net­aqy qoryndaǵy qarjysyn molaıtýyna múmkindik berilip otyr.

Bizdiń kóńilimizden shyqqan jáne bir másele - jumys berýshiniń esebinen zeı­net­aqy qoryna 5 paıyzdyq jarna­nyń qosy­latyndyǵy. Er azamattarǵa qara­ǵan­da áıelder kóbinese az jalaqy tó­le­­ne­tin jumystardy atqarady. Osy turǵydan alǵan­da, zeınetaqy qoryn­­daǵy qarjymyzǵa 5 paı­yz­dyq jar­na­ qosylyp jatsa, muny analar úshin jasalǵan qamqorlyqtyń bir kóri­nisi deýge bolady. Endi jumys berý­shi esebinen qosylatyn 5 paıyzdyq jar­nanyń tólenýin qoldanysqa engizý kesheýildemese eken.