El jáne biz týraly: Aqtóbede «Hronıkadan — bolashaqqa» kınolektorııi ótti
AQTÓBE. KAZINFORM — Prezıdent teleradıokesheniniń aýqymdy aǵartýshylyq jobasy úzdik derekti fılmderdi usyndy, dep habarlaıdy Kazinform tilshisi.
Ekologııalyq problemadan bastap týǵan jerge, elge degen súıispenshilikti, azamattyq jaýapkershilikti arqaý etken «Tamshy», «ARAL», «Sert» jáne «Qulaly aralyndaǵy adam» fılmderi aqtóbelikterdiń qyzyǵýshylyǵyn týdyrdy. Bul fılmderde el ishinde erekshe iz qaldyrǵan oqıǵalar kórinis tapty ári derekti kıno óneri ony qaz-qalpynda kóz aldymyzǵa ákelip, usyndy.
— Bul fılmder elimizdegi ekologııa máselesin, áleýmettik taqyryptardy qamtydy ári eldiń bolashaǵyn aıqyndaıtyn joba. Tek joba emes, jastar, bolashaq urpaq úshin qundy mura, — dedi Aqtóbe oblystyq máslıhat tóraǵasy Gúlqasıma Súıintaeva.
«Tamshy» fılmin tamashalaǵan aqtóbelikter Kaspıı ıtbalyǵyn qorǵap júrgen ekoeriktilerdiń eńbegine tánti boldy. Qasym-Jomart Toqaevtyń bastamasymen BUU jarııalaǵan Halyqaralyq eriktiler jylynda Kaspıı teńizin qutqarý jáne onyń biregeı endemıkalyq túri Kaspıı ıtbalyǵyn saqtaý jolyndaǵy kúres — janashyrlyqtyń úlgisi.
Aqtóbelik Narqozy Kartjannyń aıtýynsha, qazir qoǵam eriktilerdiń erligi men eńbegin túsindi, volonterlik ınstıtýt qalyptasty.
— «Tamshy» fılmi «Taza Qazaqstan» respýblıkalyq aktsııasy aıasynda sátti túsirilgen. Osydan 10-15 jyl buryn eriktiler qatarynda júrip, dál osyny armandaǵan edik. Endi, mine, sol eńbektiń jemisin búgin úlken ekrannan kórip otyrmyz. El men jer úshin qyzmet etip júrgen adamdar bar jáne olardyń eńbegi eleýli ekenin bildik, — dedi ol.
Narqozy Qartjannyń aıtýynsha, keıingi jyldary tek Kaspıı boıynda emes, elimizdiń barlyq óńirinde úlken qozǵaýshy kúsh jumyldy. Olardyń eńbegi adal jáne urpaqtar sabaqtastyǵyn qalyptastyryp keledi. Qoqys jınaý, senbilik jasaý ǵana emes, sana jańǵyrdy.
— Tazalyq mádenıeti ómirimizdiń ajyramas bóligine aınalyp keledi. Men bul dástúrdi saqtap qala alatynymyzǵa senimdimin. Bul — Memleket basshysy Qasym-Jomart Toqaev bastamashy bolǵan aýqymdy memlekettik baǵdarlamalardyń nátıjesi, — dedi Narqozy Qartjan.
Al ómir boıy Aral teńizinde balyq aýlaǵan Kúntýǵan Turǵynbaev týraly derekti fılm-portret eńbek adamynyń qajyryn kórsetedi. Onyń taǵdyry tutas bir óńirdi kóz aldymyzǵa ákeledi. Ol Aral teńizi tartylyp, jergilikti halyqtyń turmys-tirshiligi qalaı ózgergenine kýá boldy. Búginde Qúntýǵannyń tabandylyǵy men óz isine degen adaldyǵy úmittiń sımvolyna aınaldy. Teńizdiń qaıta oralýymen bolashaqqa degen senim nyǵaıyp keledi. Aqyn Juldyz Qojabekovanyń aıtýynsha, fılmniń árqaısysy ár kórermenge oı saldy.
— Meniń oıymsha Kúntýǵan Turǵynbaevtyń betindegi ájiminiń ár qatpary sýy tartylǵan Araldy kóz aldymyzǵa ákeledi. Bir adamnyń ómirinde búkil Araldyń taǵdyry jatyr. Fılmnen osyny kórdim, — dedi ol.
Aqtóbelikter úshin «Sert» derekti fılminiń de orny erekshe. Sebebi 2024 jyly bolǵan sý tasqynyn olar bastan ótkerdi. Biraq olar jalǵyz qalmady, el jumyldy. Memleket basshysy Qasym-Jomart Toqaev qamkóńil qazaqstandyqtardy sabyrǵa shaqyrdy. Ár otbasy, ár adamǵa kómek beriletinin, eshkim de jalǵyz qalmaıtynyn aıtty. Rasymen aınaldyrǵan bes aıdyń ishinde Prezıdent tapsyrmasy oryndalyp, adamdar qonys toıyn toılady.
Aty ańyzǵa aınalǵan tulǵa Petr Lýpenkov týraly derekti fılm «Qulaly aralyndaǵy adam» ataýmen kórsetildi. Fılm Kaspıı teńizinniń shalǵaıdaǵy Qulaly aralyndaǵy gıdrometeorologııalyq stantsııa basshysynyń ómiri men jumysyn baıandady.
Kórsetilimderden keıin qala turǵyndary Derekti kıno ortalyǵynyń bas prodıýseri Ádilbek Qulamanmen kezdesti. Olar fılmdi túsirý protsesi týraly kóbirek bilip, suraqtaryn qoıdy.
Esterińizge sala keteıik, QR Prezıdenti teleradıokesheniniń «Hronıkadan bolashaqqa» atty respýblıkalyq kınolektorııi Qyzylorda, Túrkistan, Shymkent jáne Taraz qalalarynda, keıin elimizdiń batys óńirinde ótti. Kınolektorıı ótkizý baǵdarlamasynda Óskemen, Semeı, Pavlodar, Petropavl, Qostanaı, Jezqazǵan, Qaraǵandy, Kókshetaý, Taldyqorǵan jáne Qonaev qalalary da bar.
Sońǵy kórsetilim 25 qyrkúıekte Almatyda ótedi dep josparlanǵan.
