Elvıra Ázimova: Negizgi mindet – terrorıster men beıbit mıtıngke qatysýshylardy naqty ajyratý
«Adam ómiri joǵary qundylyq bolyp, Konstıtýtsııanyń sheńberinde eń negizgi ózgermeıtin talap bolyp tabylady. Sondyqtan, qańtar aıynyń basynda elimizde bolǵan qaıǵyly oqıǵalar Qazaqstan men álemdik qaýymdystyqty dúr silkindirdi. Sonymen birge, lańkesterdiń qurbandary – áskerı qyzmetshiler men polıtsııa qyzmetkerleri ǵana emes, sonymen birge beıbit turǵyndar qaza boldy. Osyǵan baılanysty óz atymnan, ulttyq aldyn alý tetigine qatysýshylar atynan qaza bolǵandardyń týystary men jaqyndaryna qaıǵyryp kóńil aıtamyn. Al zardap shekken azamattar tez saýyǵyp ketsin!», - dedi E. Ázimova Ortalyq kommýnıkatsııalar qyzmetinde ótken bıýaspasóz máslıhatynda.
Óz sózinde spıker bolǵan oqıǵa árqaısymyz úshin sabaq bolýy kerektigin aıtty.
«Eldegi tynyshtyq pen beıbitshilik, tártip pen zańdylyq, zań shyǵarýshy jáne atqarýshy bılikke ǵana emes, qazaqstannyń árbir azamatyna da baılanysty. Bul bizdiń azamattyq jaýapkershiligimiz. Sonymen birge, QR Prezıdenti ustalǵan azamattarǵa naqty aıtty, aýyr qylmys jasaǵan adamdar zańǵa sáıkes qatań jazaǵa tartylady. Al basqalardyń kinásin Bas prokýratýra anyqtap, tekserip, aýyrlatatyn mán-jaılardy eskerip, jazany jeńildetý jónindegi sharalar qabyldaıdy. Kinásiz adamdar árıne bosatylady», - dedi E. Ázimova.
Onyń aıtýynsha, negizgi mindet – terrorıster men tonaýshylardy jáne beıbit mıtıngke qatysýshylardy naqty ajyratý.
«Ókinishke oraı, biz ýaqytsha ustaý ızolıatorlaryna barǵanda keıbir azamattarmen suhbattastyq. Sol suhbatta «Biz óz azamattyq jaýapkershiligimizdi sońyna deıin sezbedik. Biz Qazaqstan halqynan keshirim suraýǵa daıynbyz» degen sózder aıtyldy. Mysaly Almatyda tergeý ızolıatoryna barǵanda azamattardyń kópshiligi qarapaıym adamdar ekeni, kóbisi urlyq úshin ustalǵany anyqtaldy. Sol úshin olarǵa naqty nazar aýdarý kerek. Bul Bas prokýratýra men jergilikti terrıtorııalardyń mindettemesi.
Bul kúnderi biz azamattyq qoǵam ókilderimen birge ustalǵandar ornalasqan mekemelerge barýdy jalǵastyryp jatyrmyz. Birneshe kún ishinde biz 11 óńirde osyndaı 34 mekemege bardyq. Mundaı preventıvti barýdy jalǵastyramyz. Sebebi bizge de ol kerek. Sondyqtan prokýratýra qatigezdik týraly barlyq sıgnaldardy tekserip, olarǵa quqyqtyq baǵa berý kerek jáne berilgen nátıjesin jarııalaýy kerek. Bul jumysty formaldy túrde júrgizbeý kerek, munadjı tásil ashyqtyq pen beıtaraptyq kepili bolyp tabylady», - dedi Elvıra Ázimova.
