«El úshin týǵan erdiń izi»: Baýyrjan Momyshulyna arnalǵan taǵylymdy kezdesý ótti
ASTANA. KAZINFORM — Aty ańyzǵa aınalǵan qolbasshy, jazýshy jáne qoǵam qaıratkeri Baýyrjan Momyshulynyń 115 jyldyǵy kúni Qarýly kúshterdiń Ulttyq áskerı-patrıottyq ortalyǵynda «El úshin týǵan erdiń izi» atty is-shara ótti. Bul týraly Qorǵanys mınıstrligi málim etti.
Oǵan Mádenıet jáne aqparat mınıstrliginiń ókilderi, Qarýly kúshterdiń ardagerleri, Aqmola óńirlik garnızonynyń áskerı qyzmetshileri, áskerı kolledj kadetteri jáne «Jas sarbaz» áskerı-patrıottyq qozǵalysynyń tárbıelenýshileri qatysty.
Іs-sharany ashqan «Qarýly kúshterdiń ardagerleri» RQB tóraǵasynyń orynbasary general-maıor Marat Naǵumanov jastardy patrıottyq tárbıeleý isinde dańqty áskerı qolbasshy Baýyrjan Momyshulynyń tulǵa retindegi mańyzdylyǵyn atap ótti.
– Baýyrjan Momyshuly ult tarıhynda maıdan dalasyndaǵy erlik kórsetip qana emes, ór rýhpen, temirdeı tártippen de, joǵary mádenıetpen de óshpes iz qaldyrdy. Batyrdyń ómiri – qazirgi jáne bolashaq Otan qorǵaýshylar úshin patrıotızmniń shynaıy úlgisi, – dedi ardager.
Murajaıdyń ǵylymı qyzmetkerleri Baýyrjan Momyshulynyń qaharmandyq joly, onyń soǵystan keıingi kezeńdegi shyǵarmashylyq jáne qoǵamdyq qyzmeti týraly baıandamalar jasady. Baýyrjan Momyshulynyń jaýyngerlik tájirıbesi halyqaralyq deńgeıde tanylyp, áskerı mamandardyń, odan basqa 1960 jyldardyń basynda kezdesken kýbalyq kóshbasshy Fıdel Kastronyń shynaıy qyzyǵýshylyǵyn týdyrǵany erekshe atap ótildi.
Іs-sharada budan ózge ataqty komandırge arnalǵan arnaıy ekspozıtsııa kórsetildi. Baýyrjan Momyshulynyń jasandy ıntellekt kómegimen qalpyna keltirilgen daýysynyń aýdıojazbasyn jańǵyrtý erekshe sát boldy.
Ótip bara jatqan jyl Uly Jeńistiń 80 jyldyǵyna arnaldy. Mádenıet jáne aqparat mınıstrliginiń bastamasymen «Ardager ósıeti» respýblıkalyq jastar marafony aıasynda ul-qyzdar elimizdiń 20 óńirinde Uly Otan soǵysynyń ardagerlerine bardy. Maıdangerlerdiń jınalǵan jazabalary qoljazba túrinde saltanatty túrde Qarýly kúshterdiń Áskerı-tarıhı murajaıynyń qoryna tapsyrdy.