El úshin eńbek eter degen senimdemiz – Samat Nurtaza Nur Otan atynan saılanǵan depýtattar jaıly

NUR-SULTAN. QazAqparat – Eýrazııalyq ıntegratsııa ınstıtýtynyń sarapshysy Samat Nurtaza «Nur Otan» partııasy atynan Májiliske depýtat bolyp saılanǵan azamattarǵa qatysty pikir bildirdi, dep habarlaıdy QazAqparat tilshisi.

«Tizimdi qarap shyqtym. Jańa adamdar óte kóp eken. Meniń baıqaǵanym, burynǵy tizimnen Bekbolat Tileýhan men Gennadıı Shıpovskıh sekildi azamattar kiripti. Elge eńbegi sińgen azamattar ǵoı. Al qalǵan depýtattar týraly aıtar bolsaq, jastar burynǵydan kóp eken. Qoǵam belsendilerinen Eldos Abaqanovtyń, Erlan Saıyrov pen Aıdos Sarym, Berik Ábdiǵalı qatarly azamattardyń tizimde baryn kórdim. Elge sózi ótetin, beldi ári abyroıly azamattar. Óz basym shyn qýanyp otyrmyn. Elge paıdaly azamattar Májiliske baryp, joǵary minberde qazaq eli úshin halyq pen bılik arasyndaǵy kópir retinde eńbek eter degen senimdemin. Úlken úmit artyp otyrmyn», - dedi Samat Nurtaza QazAqparat tilshisine telefon arqyly bildirgen pikirinde.

Eske sala ketsek búgin «Nur Otan» partııasy Saıası keńesi Bıýrosynyń sheshimimen 76 kandıdattan turatyn tizim bekitilgen bolatyn. Depýtattyqqa kandıdattardyń 7-eýi ǵana burynǵy memlekettik qyzmetker, ıaǵnı Fraktsııa quramynda olardyń sany 10%-ten aspaıdy.