«El úmiti»: Elbasy qory salalyq menedjerlerdi daıarlaýǵa kirisedi
Baǵdarlama Elbasynyń «El úmiti» bastamasy aıasynda ázirlengen jáne «100 naqty qadam» Ult josparyn, sondaı-aq Qazaqstan Prezıdenti Q. Toqaevtyń ekonomıka men áleýmettik salany memlekettik basqarýda jańa tásilderdi engizý qajettigi týraly tapsyrmasyn sapaly oryndaýǵa baǵyttalǵan.
Baǵdarlamany Tuńǵysh Prezıdent qory Úkimetpen jáne AHQO-ymen birlesip júzege asyrady. Onyń basty maqsaty- salalyq kásibı tulǵalardy tabý jáne olardy ekonomıkanyń basymdyqty salalarynda ózgeristerdi basqarýda kóshbasshylar retinde odan ári daıarlaý.
2019 jyly 27 qarashada talantty jastarmen ótken kezdesýde QR Tuńǵysh Prezıdenti – Elbasy N. Á. Nazarbaev ekonomıkanyń túrli salalarynda kásibı mamandardyń qalyptasýynyń mańyzdylyǵyn atap ótti.
«Basty talap – eń úzdik bilim men álemniń jetekshi kompanııalarynda tájirıbe jınaý ǵana emes, komandada jumys isteı bilý, kúrdeli mindetter úshin jaýapkershilik ala bilý jáne olardy sońyna deıin jetkize bilý. Baǵdarlama boıynsha iriktelgen árbir maman ózgerister basqarý menedjerine deıingi oqytýdan ótedi», -dedi Elbasy.
Memleket basshysy Q. Toqaevtyń memlekettik basqarýdyń jańa modelin qurý týraly bastamasyn qoldaý úshin Salalyq menedjerlerdi oqytý baǵdarlamasy orta býyn menedjerleriniń damýyna yqpal etedi. Bul mamandar negizgi salalarda mańyzdy ról atqarady.
Baǵdarlama aıasynda birinshi kezeńde saýda jáne logıstıka, qurylys, aýyl sharýashylyǵy, geologııalyq barlaý jáne ónerkásip (sonyń ishinde – jańa ındýstrııa), sý resýrstary, óńirlik damý jáne qalalardy basqarý, týrızm, mádenıet jáne sport, bilim berý, densaýlyq saqtaý jáne medıaındýstrııa sekildi 11 saladaǵy naqty mindetterdi júzege asyrýǵa 200 qazaqstandyq kásibı mamandy tartý kózdelgen.
Baǵdarlamaǵa qatysýǵa memlekettik jáne jeke sektorlarda, sonyń ishinde shetelde turatyn, tabysty praktıkalyq tájirıbesi, kásibı bilimi bar (salany, zańnamany, saladaǵy álemdik trendti bilý, QR-nyń jáne seriktes elderdiń naryqtyq jaǵdaılaryn túsiný), eldi reformalaý mindetterin tıimdi iske asyrý úshin qajet jáne memlekettiń órkendeýine úles qosýǵa nıeti bar QR azamattary shaqyrylady.
Baǵdarlamaǵa qatysýshylar birqatar mamandandyrylǵan kýrstardan ótedi, jobalardy basqarý, ózgeristerdi basqarý, kóshbasshylyq, kommýnıkatsııa, analıtıkalyq daǵdylar salasynda qosymsha bilim men daǵdylarǵa ıe bolady; salalyq / fýnktsıonaldyq oqytýdan ótedi.
Sondaı-aq, olar halyqaralyq sarapshylarmen jumys jasaýdyń erekshe múmkindigine ıe bolady. Taǵylymdama jetekshi ınstıtýttar men óz salalaryndaǵy kásiporyndarda ótedi.
Sonymen birge, teorııalyq negizden basqa, baǵdarlamada oqytý joǵaryda atalǵan salalardaǵy 49 máseleni sheshýmen baılanysty bolady.
Baǵdarlama qatysýshylary úkimet múshelerimen jáne jetekshi halyqaralyq sarapshylarmen únemi baılanysýǵa múmkindik alady. Sondaı-aq, mentorlyqtyń arnaıy baǵdarlamasy bolady.
Tálimger retinde memlekettik jáne jeke sektorda, sonyń ishinde shetelde jumys isteıtin mamandardy tartý josparlanýda.
Baǵdarlamaǵa jalpy basshylyq etýdi QR Premer-Mınıstri Asqar Mamın bastaǵan Basqarýshy komıtet júzege asyrady. Baǵdarlamany iske asyrýdy TPQ Úkimettiń jobalyq ofısimen birge qamtamasyz etedi.
Baǵdarlamaǵa qatysý úshin úmitkerlerdiń ótinimderin qabyldaý 15 qańtarda bastalady. Salalyq komandalardy irikteý jáne qalyptastyrý protsesi osy jyldyń 15 naýryzyna deıin aıaqtalady. Bul jumyspen arnaıy táýelsiz komıssııa aınalysady. Kandıdattardy baǵalaýǵa, irikteýdiń obektıvtiligi úshin halyqaralyq sarapshylar tartylatyn bolady. Baǵdarlamaǵa qatysýǵa ótinim berý úshin cv@elumiti.kz elektrondyq poshtasyna jazýǵa bolady.
Sala jetekshilerin daıarlaýǵa arnalǵan jańa baǵdarlama úmitkerlerdiń kásibı ósýine, jekelegen salalardaǵy sarapshylardyń deńgeıiniń joǵarylaýyna jáne «100 naqty qadam» Ult josparynyń oryndalýyna jol ashady.