«El tynyshtyǵyna qyraǵylyq qajet» - respýblıkalyq basylymdarǵa sholý
ASTANA. Sáýirdiń 3-i. / QazAqparat/ - Qazaq aqparat agenttigi respýblıkalyq basylymdarda sáýirdiń 3-i, senbi kúni shyqqan ózekti materıaldarǵa sholýdy usynady.
***
Keshe reseılik «Izvestııa» gazetinde Memleket basshysy Nursultan Nazarbaevtyń «Alyp aýqymdy álem jáne ıadrolyq qaýipsizdik» degen maqalasy jaryq kórdi. Osy jarııalanymnyń aýdarmasy «Egemen Qazaqstan» gazetiniń senbilik sanynda basyldy. «ıAdrolyq qaýipsizdik salasynda búkil adamzat úshin zańdy jáne ómirlik mańyzdy baqylaý sharalaryn qabyldaı otyryp, halyqaralyq qoǵamdastyq energetıka jáne joǵary tehnologııalar salasyndaǵy jahandyq trendterdi nazardan tys qaldyrmaýy tıis. Sondyqtan ıadrolyq terrorızmmen kúres salasyndaǵy jahandyq kúsh-jiger men halyqaralyq quqyq turǵysynan alǵandaǵy ashyq ıadrolyq baǵdarlamalar arasynda oılastyrylǵan tepe-teńdik qajet», deıdi Elbasy maqalasynda.
«Elbasy Nursultan Nazarbaev Shyǵys Qazaqstan oblysyndaǵy kóktemgi sý tasqynynyń saldaryn joıý máselesi talqylanǵan jumys keńesin ótkizdi», dep jazady «Egemen Qazaqstan» gazeti. Keńeske Premer-Mınıstr K.Másimov, Prezıdent Ákimshiliginiń Basshysy A.Mýsın, Premer-Mınıstrdiń birinshi orynbasary Ó.Shókeev, Bas prokýror Q.Mámı, sondaı-aq Úkimet músheleri qatysty. Keńesti ashqan Memleket basshysy bıylǵy qys jyldaǵyǵa qaraǵanda qatal bolǵanyn aıta kelip, osy jaǵdaıda Úkimet jáne elimiz óńirleriniń basshylary Qazaqstannyń eldi mekenderin jylýmen, energııa jáne sýmen qamtýda eshqandaı aǵattyq jibermegenine toqtaldy. Prezıdent ásirese Shyǵys Qazaqstan oblysy ákiminiń qyzmetin erekshe atap ótip, Pavlodar jáne Almaty oblysy ákimderiniń jumystaryna oń baǵa bergen. Keńes jaıynda tolyq maǵlumat alǵyńyz kelse basylymnyń senbilik nómirinde jaryq kórgen «El tynyshtyǵyna qyraǵylyq qajet» degen maqalaǵa nazar salyńyz.
Sondaı-aq osy jaıt arqaý bolǵan maqalalar «Aıqyn», «Alash aınasy», «Kazahstanskaıa pravda» gazetterinde de jaryq kórdi.
«Egemen Qazaqstan» gazetiniń jazýynsha, keshe Táýelsizdik saraıynda Memleket basshysy Nursultan Nazarbaevtyń tóraǵalyǵymen Astanany odan ári damytý máselesi qaralǵan sáýlet-qurylys keńesiniń otyrysy ótti. Alqaly jıyn barysynda Elbasy elordada paıdalanýǵa berilgen jáne qurylysy júrip jatqan eńseli ǵımarattarǵa keńinen toqtalyp, aldaǵy jyldary Opera jáne balet teatry, Qazaq jáne Orys drama teatrary, Tarıh murajaıy men Oqýshylar saraıy salynatyndyǵyn habardar etken. «Qıyn kezeńderdiń ózinde de Astananyń qurylysy toqtaǵan joq» degen taqyryppen berilgen maqalany basylymnyń senbilik nómirinen oqı alasyzdar.
Keńes arqaý bolǵan maqalalar «Alash aınasy», «Aıqyn», «Astana aqshamy» gazetterinde de jarııalandy.
***
«Shý aýdanynda eki birdeı jas balanyń 31 jastaǵy sheshesin 30 myń teńge úshin esinen tandyra sabap, tirideı shuńqyrǵa kómip ketken úsh qaraqshy ustaldy», dep jazady «Aıqyn» gazeti. Qaraqshylar qylmystyq iske aldyn ala jasalǵan jospar boıynsha kirisken. Olar kompıýterlik klýbta isteıtin áıeldi ańdyp júrip, kúni boıy túsken aqshany tonamaq bolǵan. Keshkisin jumystan shyqqan áıeldi úsh jigit tarpa bas salyp, esin jınatpastan VAZ-2106 kóligine otyrǵyzyp qalanyń syrtyna shyǵarǵan. Onyń sómkesinen 2 uıaly telefon men 32 myń teńge alǵan olar áıeldi qınap, armatýramen, beton kesektermen uryp, esinen tanǵan kezde karerdegi shuńqyrǵa tirideı kómip ketken. Osy jan túrshigerlik oqıǵanyń odan ary qalaı órbigenin basylymnyń senbilik nómirinen egjeı-tegjeıli oqýǵa bolady.
Jezqazǵan jáne Sátbaev qalalarynda aýyzsý qymbattamaqshy. Oblys basshysy Serik Ahmetovtiń pikirinshe, halyqty únemshildikke úıretý men turǵyn úı-kommýnaldyq sharýashylyǵyn es jıǵyzýdyń jalǵyz amaly osy kórinedi. Bul jaıynda «Aıqyn» gazetiniń senbilik nómirinde «Ákim tarıfti ósirmek, al halyq bolsa, irkindi sý iship álek...» degen taqyryppen berilgen maqalada keńinen tarqatylyp jazylǵan. «Tarıfti arttyrmas buryn aldymen sýdyń sapasyn tekserý kerek. bul - bir. Ekinshi - aýyzsý problemasyn sheshý úshin qarjy qarastyrýdy jedeldetý qajet. Mamandardyń aıtýynsha, Keńgirge bıyl da tasqyn sýdyń quıylýy ekitalaı. Jezqazǵannyń ózi bir jylda az degende 60 mln. tekshe metr sý tutynady eken. Al sý qoımasynda qalǵany - 118 mln. tekshe metr ǵana. Basqa amal qarastyrylmasa, ol bıyl-aq sarqylady», dep túıindelgen maqala.
«Aıqyn» gazetiniń jazýynsha, Shyǵys Qazaqstandaǵy tabıǵı apat Pavlodar oblysynda da qaıtalanýy múmkin. Ertistiń arnasy shamadan tys kóterilse, ózenniń sýyn iship, balyǵyn talǵajaý etip kelgen kóptegen aýyldar topansý tutqynyna aınalady. Qala irgesindegi Lenın kentindegi úsh júzdeı úı qar sýy astynda qalady degen de qaýip bar kórinedi.
***
«Topan sýdan zardap shekken shyǵysqazaqstandyq aǵaıyndarǵa elimizdiń barlyq aımaqtarynan kómek kórsetilip jatyr. Keshe Astanadan dári-dármek pen turǵyndarǵa qajetti basqa da turmystyq taýar tıegen kezekti kerýen oqıǵa ornyna jetkizildi», dep jazady «Astana aqshamy» gazeti. Basylymnyń atap ótýinshe, elordalyq kásipkerlerdiń uıymdasýy nátıjesinde jınalǵan 20 tonnalyq taýarlar men dári-dármektiń jalpy quny 1,5 mıllıon teńgeni quraıdy. Mundaı ıgilikti qaıyrymdylyq sharadan Prezıdenttik mádenıet ortalyǵynyń ujymy da tys qalmaǵan. Olar ózderiniń 1 jáne 5 kúndik jalaqylaryn tabıǵı apattan zardap shekkkenderge kómek qoryna aýdarǵan.
«Astana aqshamy» gazetiniń jazýynsha, sáýirdiń 5-i kúni QR «elektrondy úkimet» veb-portalynda elorda ákimi Imanǵalı Tasmaǵambetovpen Memleket basshysy N.Nazarbaevtyń bıylǵy «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty halyqqa Joldaýynyń júzege asyrylý barysy týraly ınternet-konferentsııa ótpek.
***
Sáýirdiń 1-i, Kúlki kúni «Alash aınasy» gazetinde jarııalanǵan «Kóp áıel alý zańmen bekitildi» degen maqalaǵa baılanysty redaktsııaǵa hat jazyp, telefon shalyp habarlasyp, basylym saıtyndaǵy forýmda óz oılaryn ashyq bildirgen oqyrman kóp kórinedi. «Shaǵyn ǵana ázil aqparattyń ózi aýqymy keń qoǵamdyq pikir qalyptastyryp jatqanyna qarap, erteli-kesh osy zańnyń shynymen de qabyldanatyna kóz jetkizý qıyn emes sııaqty», dep jazady basylym.
«Alash aınasy» gazetiniń dástúrli «Oı-kókpar» aıdarynyń búgingi saýaly: Aıaz qyspaǵynda qalyp, sý basqan aımaqtaǵy túlekterge JOO-ǵa túsýge arnaıy kvota bólý kerek pe?.
Osy saýalǵa jaýap bergen Májilis depýtaty Nurtaı Sábılıanov «apatty aımaqtardyń mektep jasyndaǵy balalary men búgingi tańda joǵary oqý oryndarynda oqıtyn jastaryna memleket tarapynan túrli jeńildikter jasalýy tıis. Buǵan qosa qystaǵy qatty aıazdardyń saldarynan jáne kóktemdegi sý tasqyny kesirinen sabaqtan qol úzip qalǵan, bıyl mektep bitiretin túlekterdiń elimizdiń joǵary oqý oryndaryna túsýine Bilim jáne ǵylym mınıstrligi arnaıy kvota bólýi kerek» dese, ekonomıst Іlııas Isaev «qazirgi ýaqytta joǵary oqý oryndarynda bilim alý negizinen aqyly túrde júrgiziletindikten, tabıǵı apattan zardap shekken aımaqtardan shyqqan stýdentterdiń barlyǵy derlik oqýǵa qarajat tóleý múmkindiginen aıyrylyp qaldy. Bul jaǵdaıda eń tıimdisi, sondaı stýdentterdi anyqtap, olardy aqyly bólimnen grantqa aýystyrý qajet. Munyń ózi, kádimgideı jeńildik. Al apat aımaǵyndaǵy endi mektep bitiretin túlekterdiń bárine birdeı joǵary oqý oryndaryna túsýine arnaıy nemese qosymsha kvota bólý qajet dep eseptemeımin», depti.
«Memleket basshysy Nursultan Nazarbaev pravoslavtyq hrıstıandardy Pasha meıramymen quttyqtady», dep jazady «Kazahstanskaıa pravda» gazeti QR Prezıdentiniń baspasóz qyzmetine silteme jasap.
«Kóp ulttyń jáne árqıly konfessııanyń ókilderi meken etken Qazaqstanda dinaralyq ózara syılastyqtyń ıgi dástúrleri ornyqty. Bul bizdiń halqymyzdyń keńpeıildiligi men kemeńgerliginiń arqasynda, sonymen birge memleketimizdiń qoǵamdaǵy beıbitshilik pen kelisimdi nyǵaıtýǵa, túrli dinı konfessııalar men memleketter arasyndaǵy jemisti únqatysýdy qoldaýǵa baǵyttalǵan syndarly saıasatynyń nátıjesinde múmkin boldy», deligen Elbasynyń quttyqtaýynda.
QR Prezıdentiniń Pasha meıramymen quttyqtaýy «Egemen Qazaqstan» gazetinde de jaryq kórdi. «Barshańyzǵa, qymbatty meniń otandastarym, baqyt pen densaýlyq, ıgilik pen bereke tileımin», deıdi Elbasy óz quttyqtaýyn aıaqtaı kelip.
