El turǵyndarynyń kommýnaldyq tólem qaryzy 8 mlrd. teńgeni quraıdy

Bul týraly búgin Úkimettiń selektorlyq formattaǵy otyrysynda QR Qurylys jáne turǵyn úı kommýnaldyq sharýashylyǵy agenttiginiń tóraǵasy Serik Nokın málim etti.

«Ótken jyl maýsymynyń sońynda tutynýshylardyń kommýnaldyq tólem qaryzy 8,7 mlrd. teńgeni qurady. Al aǵymdaǵy jyldyń 11 qarashasyndaǵy málimetter boıynsha tutynýshylardyń kommýnaldyq tólem qaryzy 8 mlrd. teńge boldy. ıAǵnı 750 mln. teńgege tómendedi», - dedi ol.

Onyń atap ótýinshe, Memleket basshysynyń tapsyrmasyna sáıkes, agenttik atalǵan qaryzdardy tómendetýge baǵyttalǵan arnaıy joba ázirlep, ony bekitken. Atalǵan qujatqa sáıkes jylý berý maýsymy qarsańynda ákimdikter kommýnaldyq tólem qaryzdaryn 40 paıyzǵa tómendetýi qajet.

«Qaryzdary 40 jáne odan joǵary paıyzǵa tómendetýge Aqmola, Aqtóbe, ShQO, BQO, Jambyl, Pavlodar, Mańǵystaý, Ońtústik Qazaqstan oblystarynyń ákimdikteri qol jetkizdi. Qalǵan ákimdikter bul nátıjege jetken de joq», - dep atap ótken agenttik basshysy Qaraǵandy oblysy men Almaty qalasynda qosymsha qaryzdardy tómendetýge baǵyttalǵan jumystardyń qarqyndy júrip jatqandyǵyn aıtty.