El turǵyndary turmystyq qaldyqtardy suryptaýdy óz yqtııarymen isteıdi degen úmittemiz - N. Qapparov
ASTANA. QazAqparat - Qazaqstandyqtar turmystyq qaldyqtardy suryptaý boıynsha mindettelmeıdi. Bul týraly búgin Ortalyq kommýnıkatsııalar qyzmetindegi brıfıngte QR Qorshaǵan orta jáne sý resýrstary mınıstri Nurlan Qapparov málim etti.
«Biz eshkimdi de mindettemeımiz. Azamattar bul ıgilikti jumysty óz yqtııarymen isteıdi dep úmittenemiz. Osyny atqarý úshin, qaldyqty suryptaý durys ekenin túsindirý kerek. Al bundaı múmkindikti jasaý úshin aýlalarda qoqys salatyn eki jáshikti ornatý qajet. Olardyń biri azyq-túlik qaldyqtaryna, ekinshisi ózge qaldyqtarǵa negizdelýi tıis. Osyndaı jaǵdaı jasalǵannan keıin, adamdar ár qaldyqty óz ornyna bólip tastaý kerektigin túsinedi. Adamdar birden qaldyqtardy suryptaıdy dep oılamaımyz, degenmen de turǵyndar birte-birte osy máselege mán bere bastaıdy. Keıinnen, ekologııaǵa jaýapkershilikpen qaraıtyndardyń qarasy qalyńdaı túsedi degen oıdamyn»,-dedi mınıstr.
Onyń sózine qaraǵanda, Qazaqstanda alǵashqy kezde azyq-túlik jáne azyq-túlik emes qaldyqtar bolyp suryptalady. Bul júıe eń birinshi Astanada engizilýi múmkin.
