El turǵyndary arasynda erikti zeınetaqy jarnalarynyń tanymaldyǵy artyp keledi

ASTANA. QazAqparat – Bıyl qańtar-mamyrda erikti zeınetaqy jarnalarynyń (EZJ) kólemi 899,1 mln teńgeni qurady. Bul búkil 2021 jyldaǵydan jáne onyń aldyńǵy jyldardaǵydan kóp, dep habarlaıdy QazAqparat tilshisi.

Ranking.kz portalynyń málimetinshe, 2022 jyldyń qorytyndysy boıynsha EZJ-ǵa aýdarymdar 3 esege jýyq ósip, 2,3 mlrd teńgeni qurady. Jarnanyń bul túriniń tanymaldyǵy 2019 jyldan bastap artyp keledi.

2022 jylǵy ósim azamattardyń zeınetaqy jınaqtarynyń osy túrine qyzyǵýshylyǵymen ǵana emes, zańnamalyq ózgeristermen de baılanysty. Sol jyly Qazaqstandyq depozıtterge kepildik berý qorynan (QDKQ) BJZQ-ǵa talap etilmegen depozıtterge kepildik berý rásimi kúshine endi, bul EZJ shottarynyń kóbeıýine sebep boldy. Birneshe jyl boıy taratylǵan bankterdiń salymshylarynyń talap etilmegen somalary qorda boldy. Olardyń kópshiliginiń aınalys merzimi aıaqtaldy, sondyqtan zańnamalyq deńgeıde olardy qazaqstandyqtardyń BJZQ-daǵy erikti zeınetaqy shottaryna aýdarý týraly sheshim qabyldandy. Salymshylar úshin eń bastysy — bul somalar ınvestıtsııalanyp, zeınetaqy aktıvterimen teń ınvestıtsııalyq tabys ákelýi.

Jańa zańnama 2022 jyldyń mamyrynda kúshine endi, dál osy ýaqytta EZJ aıtarlyqtaı (QDKQ transfertteri arqyly 830 mln teńge alyndy) ósti. Sonymen qatar, jınaqtardyń odan ári ósýi, onyń ishinde jarnalardyń ósýi jalǵasty.

Erikti zeınetaqy jarnalaryn jeke tulǵalar da, zańdy tulǵalar da sala alady. Zańdy tulǵalardyń óz qyzmetkerleriniń paıdasyna, al jeke tulǵalardyń ózi úshin de, jaqyndary úshin de EZJ salý múmkindigi bar. Bul rette siz ózińizdiń zeınetkerlik shotyńyzdy ǵana emes, bolashaǵy mańyzdy adamdardyń: jumys istemeıtin jubaıyńyzdyń nemese eńbek demalysyna shyqqan ata-anańyzdyń da shottaryn toltyra alasyz.

EZJ aıasynda jınaqtardyń ósýi halyqtyń zeınetaqy qoryna degen seniminiń artqanyn aıǵaqtaıdy.