El turǵyndaryna daýys berýmen baılanysty jalǵan aqparattar týraly eskertý jasaldy
ASTANA. KAZINFORM-Aıta keteıik, Qazaqstan Respýblıkasy Prezıdenti janyndaǵy Ortalyq kommýnıkatsııalar qyzmetiniń Jalǵan aqparatqa qarsy is-qımyl ortalyǵynyń (JAQ) resmı arnasy daýys berýdiń aıaqtalýyna baılanysty aqparattyq keńistikke monıtorıng júrgizip jatyr.
- Buǵan deıin boljanǵandaı, kúni boıy daýys berý rásimine qatysty tıptik feıkter men manıpýlıatsııalyq materıaldardyń taralýy tirkeldi. Saılaý ýchaskeleriniń jabylýymen mundaı aqparattyq shabýyldardyń belsendiligi, ádette jańa kezeńge ótedi. Ortalyqtyń boljamy boıynsha, jalǵan aqparattyń qarqyny túpkilikti báseńdegenge deıin negizgi ekpin daýys berý protsesinen daýystardy sanaý rásimi men onyń nátıjelerine kúmán keltirýge aýysady, -delingen habarlamada.
Atap aıtqanda, aqparattyq keńistikte mynadaı málimetter taralýy múmkin:
- daýys berýdiń nátıjeleri aldyn ala belgili boldy delingen «aqparattyń tarap ketýi»;
- jalǵan ekzıt-poll nátıjeleri;
- «daýys sanaý kezinde bıýlletenderdi aýystyrý» týraly negizsiz málimdemeler;
- «saılaý jáshikterin» nemese qujattamany «jasyryn alyp ketý» týraly habarlamalar;
- jelide taratylatyn, qorytyndy nátıjeler retinde usynylǵan «qujattar» men kesteler;
- «referendýmdy ótpedi dep taný» týraly negizsiz málimdemeler.
Túrli elderdegi elektoraldyq naýqandardy baqylaý tájirıbesi kórsetkendeı, qandaı ma aqparattyq shabýyldardyń bir bóligi kelesi kúni de taralýy múmkin. Bul kezeńde daýys berýdiń jekelegen epızodtaryn burmalap kórsetý, sondaı-aq referendýmnyń mańyzdylyǵyn tómendetýge baǵyttalǵan jarııalanymdar jıi paıda bolýy múmkin.
- Jalǵan aqparatqa qarsy is-qımyl ortalyǵy jalǵan aqparat taratý faktilerin anyqtaýdy jáne qoǵamdyq pikirdi manıpýlıatsııalaý áreketterine jedel den qoıýdy jalǵastyrady, -delingen ortalyq habarlamasynda.
Osyǵan deıin Konstıtýtsııa jobasyna qatysty jalǵan aqparat taratqandardyń jaýapqa tartylǵany týraly jazdyq.
