El turǵyndary jańa chat-bot arqyly ekologııalyq máseleni sheshýge ótinim bere alady

ASTANA. KAZINFORM – Bıylǵy 5 shildeden bastap turǵyndar ótinim berýge arnalǵan jańa servıs @TazaQazBot chat-boty jumys istep tur. Bul týraly OKQ alańynda QR Ekologııa jáne tabıǵı resýrstar vıtse-mınıstri Jomart Álıev aıtty.

Onyń aıtýynsha, bul chat-botty qoldaný ońaı: tirkelip, másele bar jerdiń (lastanǵan, qoqys jınalǵan – red.) meken-jaıyn kórsetip, fotosýret júktep, jaǵdaıǵa qatysty pikir jazyp, joldaýǵa bolady.

«Ótinim túrindegi barlyq aqparat jergilikti atqarýshy organnyń operatoryna kelip túsedi, ol ótinishterdi iriktep, oryndaýshyny taǵaıyndaıdy. Ótinim sanatyna baılanysty oryndaýshynyń tapsyrmany oryndaıtyn ýaqyty avtomatty túrde belgilenedi. Jumys aıaqtalǵannan keıin oryndaýshy fotosýretti jáne qajet bolǵan jaǵdaıda tıisti túsiniktemelerdi qosady», – dedi vıtse-mınıstr.

Paıdalanýshylarǵa yńǵaıly bolýy jáne jaýapty oryndaýshylardy anyqtaý úshin barlyq problemalyq másele 17 sanatqa bólinedi: saıabaqtar men alleıalardy, úılerdi tazalaý, jaryqtandyrý, abattandyrý, qurylys jáne turmystyq qoqystardy shyǵarý, aýla alańdarynyń jaı-kúıi jáne t.b.

Ótinish berýshiniń jumysty atqarǵan jergilikti atqarýshy organ reıtıngin belgileý múmkindigi bolady jáne jumystardy aıaqtaý týraly habarlama alady.

Chat-bot iske qosylǵannan beri 6 myńnan astam ótinim kelip túsken.

Aıta keteıik, elimizde «Taza Qazaqstan» ekologııalyq mádenıetin damytý tujyrymdamasy bekitiletinin habarlaǵan edik.

Tujyrymdama aıasynda 2025-2027 jyldar aralyǵynda qaldyqtardy suryptaý jáne qaıta óńdeý jobalary iske asyrylmaq.

Sondaı-aq, qorshaǵan ortany qorǵaý men ekologııalyq qaýipsizdikke baǵdarlanǵan balalarǵa arnalǵan ǵylymı jáne praktıkalyq bilim júıesi ázirlenedi.