«El tulǵasy» ataǵyna laıyqtylar anyqtalady
ASTANA. 12 naýryz QazAqparat - Birneshe kúnnen keıin «El tulǵasyna» halyqtyq daýys berýdiń qorytyndysy jarııa etiledi.
Bastalǵanyna 11 aı bolǵan shara barysynda esimi elge tanymal azamattarǵa «Qoǵamdyq qyzmet», «Bıznes», «Ǵylym», «Mádenıet jáne óner» jáne «Sport» atalymdary boıynsha berilgen daýys sany 20 myńǵa jýyqtap qalypty.
20let.kz saıtynyń derekterine sáıkes, daýys berý nátıjeleri boıynsha «Ǵylym» atalymy kósh bastap keledi. Internet jáne uıaly baılanys arqyly sms jibergen 5044 azamat A.Bekturov atyndaǵy hımııa ǵylymdary ınstıtýtynyń bas dırektory, hımııa ǵylymdarynyń doktory, professor, QR UǴA-nyń akademıgi Edil Erǵojındi ǵylym salasyndaǵy «el tulǵasy» dep sanaıdy. Ekinshi orynda da - hımık. Ál-Farabı atyndaǵy Qazaq ulttyq ýnıversıteti Janý probelmasy ınstıtýtynyń dırektory, professor, akademık Zulqaıyr Mansurovtyń jınaǵan daýystar sany - 3975. Úshtikti Eýrazııalyq matematıkalyq ınstıtýttyń dırektory, fızıka-matematıka ǵylymdarynyń doktory, professor Muhtarbaı Ótelbaev 2884 daýyspen tuıyqtap tur.
Kelesi kóp daýys jınaǵan atalym - «Mádenıet jáne óner». Aqyn, aýdarmashy, Qazaqstan Jazýshylar odaǵynyń múshesi Baqytjan Qanapııanov 932 daýyspen birinshi orynǵa shyqsa, 579 daýyspen aqyn, Qazaqstannyń halyq jazýshysy Oljas Súleımenov ekinshi, al Qazaqstannyń halyq ártisi, ánshi Roza Rymbaeva 357 daýyspen úshinshi orynǵa turaqtaǵan.
«Sport» atalymynda eń mol daýysty, naqty aıtqanda 437 daýysty boksshy, eki dúrkin álem chempıony Serik Sápıev ıelegen. Odan keıingi oryndarda 341 daýyspen Beıjiń olımpıadasynyń chempıony, ziltemirshi Ilıa Ilın jáne 279 daýyspen Qazaqstannyń eń úzdik sportshylarynyń biri Samat Smaqov tur.
«Qoǵamdyq qyzmet» atalymynda 314 daýys jınaǵan Qazaqstannyń halyq aqyny Muhtar Shahanov kósh basynda. Odan keıingi oryndarǵa 207 daýyspen «Saıası táýekelderdi baǵalaý toby» konsaltıngtik uıymynyń dırektory Dosym Sátbaev pen 103 daýyspen tanymal saıasatker Bolat Ábilov jaıǵasqan.
Bıznestiń tasyn órge domalatqandar úshtigine 282 daýyspen tanymal kásipker Nurlan Smaǵulov, 227 daýyspen «Kazkommertsbank» Dırektorlar keńesiniń tóraǵasy Nurjan Subhanberdın, 188 daýyspen «Raıymbek grýpp» JShS-niń prezıdenti Raıymbek Battalov kirip otyr.
Aıta keteıik, Exclusive iskerlik jýrnaly, Stosorok.kz qyzmeti jáne Kcell uıaly baılanys operatory uıymdastyryp otyrǵan bul baıqaýǵa daýystar vKontakte, Facebook, Odnoklassnıkı jáne MoıMır syndy áleýmettik jelilerde elektrondy poshta jáne sms arqyly qabyldanady.
