«El tulǵasy» aktsııasynyń «Qoǵamdyq qyzmet» atalymynda N.Nazarbaev halyqtyń daýys sandary boıynsha alda keledi
ASTANA. 19 qańtar. QazAqparat - «El tulǵasy» aktsııasynyń birinshi aıynda bes atalym boıynsha 1 myń 730 daýys kelip tústi.
Aıta keteıik, 2011 jyldyń 22 jeltoqsanynda Qazaqstan Táýelsizdiginiń 20 jyldyǵyna oraı «El tulǵasy» atty halyqtyq daýys berý sharasy bastaý alǵan bolatyn. Osy aktsııa barysynda elimizdiń damýyna úles qosqan adamdardyń aty ataldy.
Kóshbasshylardyń esimderi «Qoǵamdyq qyzmet», «Bıznes», «Ǵylym», «Mádenıet jáne óner», sondaı-aq «Sport» sekildi bes atalym boıynsha 2012 jyldyń naýryzynda baıqaý aıaqtalǵannan keıin belgili bolady.
Daýys berý bastalǵaly beri 1 aı ótkennen keıin barlyǵy 1 731 daýys jınaldy.
18 qańtardaǵy málimetke qaraǵanda, daýys sany boıynsha «Qoǵamdyq qyzmet» atalymynda Elbasy Nursultan Nazarbaev, «Bızneste» Nurlan Smaǵulov, «Ǵylym» boıynsha Zýlhaır Mansurov, «Mádenıet jáne ónerde» Baqytjan Qanapııanov jáne «Sport» atalymynda Samat Smaqov alda kele jatyr.
Daýys berý áleýmettik jeliler, elektrondyq poshta jáne uıaly telefonnyń sms habary arqyly júrgizilip jatyr. Qazirgi kezde daýystyń basym bóligi sms-ke (38 paıyz) qaraǵanda kóbine ınternetpen (62 paıyz) kelip túsýde.
«El tulǵasy» daýys berý sharasyn Exclusive iskerlik jýrnaly, Stosorok.kz qyzmeti men Kcell uıaly operatory uıymdastyryp otyr.
Konkýrs «Panorama», «Nasha jızn», Massaget.kz, Nur.kz, Gazeta.kz, Quorum.kz portaldarynyń aqparattyq qoldaýymen ótýde. Daýys berý merzimi 2,5 aıǵa jalǵasady.
