El tiregi – eńbek adamy: 5 mıllıondyq shaıqas
ASTANA. KAZINFORM — Eńbekpen ómir súrip, mańdaı terimen nápaqasyn taýyp júrgen jandar úshin 27 jeltoqsan erekshe kún bolmaq. Sol kúni saǵat 10:00-de «Habar» telearnasynda Qazaqstandaǵy jumysshy mamandyqtar arasyndaǵy alǵashqy realıtı-joba - «Sheberler shaıqasynyń» sheshýshi kezeńi kórsetiledi.
Bul joba bir maýsym boıy kórermendi jaı ǵana saıyspen emes, naǵyz ómirdiń ózimen qaýyshtyrdy. Dánekerleýshi de, qurylysshy da, aspaz ben avtoslesar, aǵash sheberi de kamera aldynda emes, kúndelikti jumysyndaǵydaı ter tókti. Ár tapsyrma shynaıy eńbekke jaqyn, ár synaq adam tózimin, minezin, jaýapkershiligin tarazylady. Sol sebepti bul jarys upaı jınaý úshin emes, adam bolmysyn ashý úshin ótti.
Aqyry sol qıyn joldan súrinbeı ótken bes azamat fınalǵa jetti. Olardyń árqaısysy óz isine adal, otbasy úshin tirek, qoǵamǵa qajet maman.
Almatylyq aspaz Jamılıa Abdreshova úshin as daıyndaý jaı kásip emes, otbasyn asyraǵan ómirlik mindet. Qıyn sátte búkil jaýapkershilik óz ıyǵyna túskende, ol synbady. Búginde 15 jyldyq tájirıbesi bar bilikti maman retinde, eń úlken marapatty medaldan emes, balalarynyń «anashym, dámdi boldy» degen sózinen tabady.
Qaraǵandylyq avtoslesar Erjan Ertaýbaı eńbekke tym erte aralasty. 16 jasynda qaltasynda bir tıyny joq kúıde jumys bastap, keı túnderdi avtoservıste ótkizdi. Biraq qajymady. Temir tulparlar onyń taǵdyryna aınalyp, eńbek ómirde alǵa jeteleıtin jalǵyz jol boldy. Onyń tarıhy únsiz tózim men er-azamatqa tán jaýapkershiliktiń aıǵaǵy.
Shymkentten kelgen qurylysshy Bahytjan Ormoldaev úshin qurylys bala kezden bastalǵan taǵdyr joly. Ákesine kómektesýden bastalǵan eńbek búgin 20 jyldyq tájirıbege ulasqan. Ol úshin jumys sharshaý emes, kerisinshe tynyǵý. Salǵan ár nysanynda onyń kásibine degen shynaıy mahabbaty kórinip turady.
Jańaózendik tiginshi Kóbeısin Esetov erte eseıdi. Ákesinen aıyrylǵan soń, otbasynyń bar salmaǵy onyń moınyna tústi. Sol kezden bastap qolónerdi nápaqa emes, ómirlik jolyna aınaldyrdy. Onyń eńbeginde týǵandaryna degen jaýapkershilik pen bir tańdaýdan taımaý bar.
Almaty oblysynan kelgen aǵash sheberi Erkebulan Ýálıevtiń óneri – atadan balaǵa jalǵasqan amanat. Atasy men ákesinen daryǵan sheberlik, bala kúngi arman jeke sheberhana ashý, aǵashqa degen sheksiz súıispenshilik onyń ár jumysyn jandy dúnıe sekildi sóıletedi.
«Sheberler shaıqasynyń» fınaly – bir jobanyń aıaqtalýy emes. Bul eleýsiz qalyp kelgen jumysshy mamandyqtarynyń qadirin arttyrýǵa degen talpynys. Fınalda júzden júırik anyqtalyp, 5 mıllıon teńge kólemindegi bas júlde óz ıesin tabady.
Qaısarlyq, tolqý, sońǵy sekýndqa deıingi tartys pen óz eńbekterimen elge úlgi bolǵan azamattarǵa degen maqtanysh – bári de 27 jeltoqsan kúni saǵat 10:00-de «Habar» arnasynda. Bul fınal eńbekti qurmettegen ár adamǵa arnalǵan.