El Táýelsizdiginiń 30 jyldyǵyna oraı qansha adam raqymshylyqqa iligedi
«Memleket basshysynyń tapsyrmasyna sáıkes, Іshki ister mınıstrligi «Táýelsizdiktiń 30 jyldyǵyna baılanysty raqymshylyq jasaý týraly» Zań jobasyn ázirledi. Onyń maqsaty – onsha aýyr emes jáne aýyrlyǵy ortasha qylmys úshin jazadan bosatý, keıbir aýyr jáne asa aýyr qylmystar úshin jazanyń merzimin qysqartý. Raqymshylyq - ardagerlerge, kámeletke tolmaǵandarǵa, jasy úlkenderge, 1-shi jáne 2-shi toptaǵy múgedekterge, sondaı-aq qoǵamǵa qaýip tóndirmeıtin adamdarǵa qoldanylady. Zań jobasy memlekettik organ ókilderimen, qoǵam qaıratkerlerimen jáne sarapshylarmen talqylandy», - dedi Erlan Turǵymbaev.
Mınıstrdiń dereginshe, elimizde 64 mekeme men 16 tergeý ızolıatorynda 34 myń adam bar. Onyń ishinde 30 myń azamatqa sot úkimi shyqqan. Qalǵan 4 myń adam tergeý men qamaýda. 93 paıyzy aýyr jáne asa aýyr qylmys jasaǵany úshin qamaýda otyr. 45 paıyzy – buǵan deıin birneshe ret sottalǵandar. Sonymen qatar 32 myń adam probatsııalyq baqylaýda tur.
«Joba boıynsha 2 236 sottalýshyǵa, 11 310 probatsııada turǵan adamǵa raqymshylyq jasalady. Nátıjesinde 1 myń adam qamaýdan bostandyqqa shyǵady. 3 818 adam probatsııalyq baqylaýdan bosatylady. 1 294 sottalýshyǵa, 7 492 probatsııada turǵan adamǵa jaza merzimi qysqartylady. Sotqa deıingi tergeýdegi 5 myń is qysqarady. Qylmystyq kodekstiń 78-babyna sáıkes, asa aýyr qylmys jasaǵan adamdarǵa raqymshylyq qarastyrylmaǵan», - dedi ol.