El tarıhyndaǵy tuńǵysh Jaýyngerlik paradqa 7 myń sarbaz, 400 áskerı tehnıka, 80 ushaq pen tikushaq qatysýda
ASTANA. 7 mamyr. QazAqparat - Búgin «Otar» 40-ynshy áskerı bazasynda Memleket basshysy - Qazaqstan Respýblıkasy Qarýly Kúshteriniń Joǵarǵy Bas Qolbasshysy Nursultan Nazarbaevtyń qatysýymen ótip jatqan Jaýyngerlik paradqa Qazaqstan Qarýly Kúshteriniń 7 myń sarbazy, serjanttary men ofıtserleri, 400 jaýyngerlik kólik, 80 ushaq pen tikushaq jumyldyryldy.
Bul týraly QR Qarýly Kúshteriniń Joǵarǵy Bas Qolbasshysy Nursultan Nazarbaevqa esep berý kezinde paradqa basshylyq etýshi Qazaqstan Qarýly Kúshteri Qurlyq áskerleriniń Bas qolbasshysy, general-leıtenant Murat Maıkeev málim etti.
Osydan keıin Jaýyngerlik paradtyń ekinshi bólimi bastalyp, jaýyngerler Qazaqstan Qarýly kúshteriniń soǵys jaǵdaıyndaǵy múmkinshilikterin kórsetýge kiristi.
Atap aıtar bolsaq, Sý-25, Mıg-29, Sý-27, L-39 jáne ózge de ushaqtar men Qazaqstanda qurastyrylǵan tikushaqtar kórsetildi. «Jetisý» jáne «Suńqar» toptary ushý máneriniń joǵarǵy sheberligin pash etti. Áýe Qorǵanysy Kúshteriniń áýe shabýylyna qarsy qorǵanysyn kórsetý úshin áýedegi nysanalar boıynsha S-125 zenıtti-raketaly keshennen zenıtti basqarylatyn raketalar jiberildi.
Sondaı-aq, Raketalyq áskerler men artıllerııa qarýlary tanystyryldy. Máselen, olardyń arasynda «Tochka Ý» taktıkalyq raketalyq keshender, «Grad» jáne «Prıma» zalppen atý raketalyq júıeleri, MSTA-B jáne D-30 gaýbıtsalary, «Solntsepek» aýyr otty qarý júıeleri, «Shtýrm-S» tankige qarsy raketalyq kesheni jáne basqalary bar.
