El taǵdyryna beı-jaı qaramaıtyn ár qazaqstandyq saılaýǵa qatysaryna senimdimin – Jıgýlı Daırabaev

ASTANA. QazAqparat – QR Prezıdenttigine úmitker Jıgýlı Daırabaev eldegi Prezıdent saılaýy týraly pikirin bildirdi, dep habarlaıdy QazAqparat tilshisi.

«Kóńil-kúıim óte joǵary. Búgin memleketimizde úlken saıası dodanyń qorytyndy kúni. Men de Qazaqstan Respýblıkasynyń azamaty retinde búgin saılaýǵa keldim, óz tańdaýymdy jasadym. Saılaý kezinde jasaǵan tańdaýym Otanym – súıikti Qazaqstanymnyń árbir azamatynyń turmysynyń jaqsarýy, halyqtyń baı-qýatty ómir súrýi, álemdik qaýymdastyqta joǵary deńgeıde oryn tabýyna baılanysty. Bizdiń memlekettiń bolashaǵy óte zor. Osyndaı nıetpen búgingi saılaýǵa qatystym. Árıne el taǵdyryna beı-jaı qaramaıtyn ár qazaqstandyq, qoǵamda óziniń jaýapkershiligin túsinetin árbir sanaly azamat búgingi saılaýǵa qatysyp, tańdaǵan kandıdattaryna daýys bererine senimdimin», - dedi Jıgýlı Daırabaev.

Prezıdenttikke úmitker barsha qazaqstandyqqa zor densaýlyq, amandyq, beıbit ómir tiledi.

Aıta keteıik, prezıdenttikke kandıdat J. Daırabaev Astanada Túrkistan kóshesinde ornalasqan 396 saılaý ýchaskesine daýys berýge keldi. Onyń qasynda jubaıy, balalary jáne týystary boldy.

El boıynsha saılaýǵa barlyǵy 10 101 ýchaske iske qosylady, saılaýshylar tizimine 11 950 485 azamat engizildi. Qazaqstan Respýblıkasynyń shet memleketterdegi ókildikteri janynan 53 elde 68 saılaý ýchaskesi quryldy.