El shejiresindegi alǵashqy dinbasymyz Jádikuly Músiráli qaziretti urpaǵy eskerýsiz qaldyrmasa ıgi

Búgin QR Parlamenti Májilisiniń jalpy otyrysynda Úkimet basshysynyń atyna joldaǵan saýalynda depýtat Qylyshbaı Bısenov osylaı málim etti.

«Elbasymyz N.Á.Nazarbaevtyń tikeleı tapsyrmasy boıynsha qaıta jazylyp jatqan táýelsiz elimizdiń tarıhyn qalyptastyrýdaǵy ózindik orny bar jeke tulǵalardy el esinde qaldyrý maqsatymen respýblıkalyq «Mádenı mura» baǵdarlamasy naqtyly sharalardy iske asyra bastaǵanyn kórip otyrmyz. Bul - halqymyz úshin, keleshek urpaq úshin jasalyp otyrǵan baǵa jetpes mańyzdy shara. Osy oraıda qazaq handyǵyn qalyptastyrý kezinde asa mańyzdy dinı aǵartýshylyq jáne qoǵamdyq qaıratkerlik qyzmet atqarǵan, el erteńin elden buryn kóre bilgen kóripkel-pirádar, tarıhta Táýke hannyń «Jeti jarǵysy» atanǵan alǵashqy «Ata Zańǵa» musylmanshylyq qaǵıdalaryn dala dástúrine beıimdep endirgen tuńǵysh zańger-haziretimiz, el shejiresindegi alǵashqy dinbasymyz Jádikuly pir Músiráli sopy áziz», - deıdi Q. Bısenov. Onyń aıtýynsha, 1639 jyly qazirgi Qyzylorda oblysynyń Qyzylqum betkeıinde dúnıege kelgen. Músiráli Jádikuly zamanynda musylmansha bilim alǵan, ómir boıy ıslamnyń qundylyqtaryn dáriptep ótken jan. «Músiráli sopynyń eldigimizge, halyqtyń birligin saqtaýǵa, ıslam dinine sińirgen eńbegi óz dárejesinde baǵalansa nur ústine nur bolar edi. Onyń ómir joly - Qazaq eli tarıhynyń bir bóligi bolsa da, tulǵa esimin el esinde qaldyrý úshin elep-eskerip ulyqtaý kúni búginge deıin memleket nazarynan tys qalyp otyr. Sonyń naqtyly dáleli 2009 jyly respýblıka kóleminde atalyp ótýge tıisti 370 jyldyǵy da eskerýsiz qaldy. Bul - elimiz úshin úlken syn, tarıhymyz úshin qııanat. «Músiráli 40 jasynda qazaq pirligine saılanyp, 39 jyl áz Táýkeden Abylaı hanǵa deıin tapjylmaı qazaqtyń bas ýáziri dárejesinde qyzmet atqarǵan, alǵashqy qazaq handyǵy tusyndaǵy uly tulǵa. Ol tuńǵysh saılanǵan Pir jáne ol dúnıeden ótken soń, jalpyqazaqtyq pir saılanbaǵan. Haziret 1721 jyly kúzde 82 jasynda ómirden ótip, tirshiliginde óziniń jebeýshi piri bolǵan Sozaqtaǵy Baba Túkti Shashty Ázız áýlıeniń oń jaǵyna jerlengen. Uly oıshyl, kóripkel, alǵyr, qudiretti is-áreketimen «Jeti ólikke jan bergen Músiráli» atanyp, halyqtyń sheksiz qurmetine, senimine bólengen. Osylarǵa baılanysty alǵashqy qazaq handyǵy tusynda Uly tulǵa Pir Músiráli sopy ázizdiń halqy, eli úshin atqarǵan zor eńbegin baǵalap kóterý, ulyqtaý, esimin tarıhta qaldyrý sharalaryn qarastyrsaq ıgi», - dedi depýtat.