El shekarasyndaǵy 30 ótkizý pýnkti jańǵyrtylady
ASTANA. KAZINFORM — Qazaqstannyń memlekettik shekarasyndaǵy 30 avtomobıl ótkizý pýnktin jańǵyrtý kózdelgen. Qazirgi ýaqytta olardyń úsheýinde — «Álimbet – Orsk», «Syrym – Mashtakovo» jáne «Qosaq – Pavlovka» ótkizý pýnktterinde qurylys-montaj jumystary júrgizilip jatyr.
Memleket basshysynyń ótkizý pýnktterin jańǵyrtý jáne damytý jónindegi tapsyrmasyn iske asyrý aıasynda Aqtóbe oblysyndaǵy «Álimbet» avtomobıl ótkizý pýnktinde Qazaqstan Respýblıkasy men Reseı Federatsııasynyń kólik jáne shekara vedomstvolary ókilderiniń jumys kezdesýi ótti. Jıynda Kólik vıtse-mınıstri Maqsat Qalıaqparov pen RF kólik mınıstriniń orynbasary Valentın Ivanov tóraǵalyq etti.
Kezdesý barysynda taraptar Qazaqstan men Reseı arasyndaǵy kólik qatynasyn damytý, memlekettik shekara arqyly ótkizý múmkindigin arttyrý jáne shekara ınfraqurylymyn jetildirý máselelerin talqylady.
Jıyndaǵy negizgi máselelerdiń biri Qazaqstan-Reseı memlekettik shekarasynyń jekelegen ýchaskelerinde avtokólik quraldarynyń shoǵyrlaný jaǵdaıy jáne kóliktiń kedergisiz ótýin qamtamasyz etý sharalary boldy. Taraptar sondaı-aq ótkizý pýnktteriniń ótkizý qabiletin arttyrý jáne memlekettik shekaradan ótý rásimderin jetildirýdiń ózekti máselelerin qarastyrdy.
Kezdesýde aqparattyq júıelerdi ıntegratsııalaý jáne kólik rásimderin tsıfrlandyrý máselelerine erekshe nazar aýdaryldy. Atap aıtqanda, aqparattyq júıelerdi ıntegratsııalaý, e-SMR elektrondyq taýar-kólik júkqujatyn damytý, E-Permit júıesine kóshý, pılottyq joba aıasynda ınspektsııalyq-tekserý keshenderimen derekter almasý, navıgatsııalyq plombalardy qoldaný, sondaı-aq júrgizýshisiz kólik quraldaryn paıdalaný jobalaryn keńeıtý máseleleri talqylandy.
Sonymen qatar, jumys sapary aıasynda delegatsııa «Iletsk-1» temirjol ótkizý pýnktine, sondaı-aq «Jaısan» avtomobıl ótkizý pýnktine bardy.
Jalpy, Qazaqstannyń memlekettik shekarasyndaǵy 30 avtomobıl ótkizý pýnktin jańǵyrtý kózdelgen. Qazirgi ýaqytta olardyń úsheýinde — «Álimbet – Orsk», «Syrym – Mashtakovo» jáne «Qosaq – Pavlovka» ótkizý pýnktterinde qurylys-montaj jumystary júrgizilýde.
Kólik mınıstrliginiń málimetinshe jumystardy 2026 jyldyń sońyna deıin aıaqtaý josparlanǵan. Qalǵan ótkizý pýnktterindegi jumystardy aıaqtaý 2027 jylǵa josparlanǵan.
Kezdesý qorytyndysy boıynsha taraptar ózara kólik qatynasyn damytý, shekaralyq ınfraqurylymdy damytý jáne rásimderdi tsıfrlandyrý baǵytyndaǵy birlesken aldaǵy jumystyń qadamdaryn aıqyndady. Bul sharalardy iske asyrý shekaranyń ótkizý múmkindigin arttyrýǵa, kólik quraldarynyń ótý ýaqytyn qysqartýǵa jáne halyqaralyq tasymaldaýshylar úshin qolaıly jaǵdaı jasaýǵa múmkindik beredi.
Aıta ketelik 5 el, 15 myń shaqyrym shekara, 101 ótkizý beketi: El terrıtorııasynyń shet-shegi qalaı kúzetiletini týraly jazǵan edik.
