«El reıtıngi kóterilgen jyl» - respýblıkalyq basylymdarǵa sholý

***

«Qazaqstan ekonomıkasy álem­dik daǵdarystan súrinbeı ótip, damýdyń jańa baspaldaqtaryna qadam basty. Ony bıylǵy jyl­dyń ekonomıkalyq tabystarynan da, qarjy salasynyń turaq­ta­nýy­nan da anyq baıqaýǵa bolady», - dep jazady «Egemen Qazaqstan» gazeti búgingi nómirinde jaryq kórgen «El reıtıngi kóterilgen jyl» degen maqalasynda.

Basylymnyń jazýynsha, jaqynda Standard & Poor's (S&P) halyqaralyq reıtıng agent­tigi Qazaqstan Res­pýblıkasynyń uzaq merzimge arnalǵan táýelsiz nesıelik reıtıngin taǵy da joǵary baǵalady. Atap aıtqanda, elimiz­diń sheteldik jáne ulttyq valıýtalar boıynsha mindettemesin tıisinshe «VVV-» jáne «VVV»-dan «VVV» jáne «VVV+»-ke deıin kóterdi. Sonymen birge, qysqa merzimdi táýelsiz kredıttik reıtıng mindettemeleri boıynsha sheteldik valıýta reıtıngi «A-3» jáne ulttyq valıýta boıynsha reıtıng shkalasyn «kzAAA» dáre­jesine deıin kóterdi. Al ulttyq valıýta boıynsha qysqa merzimdi táýelsiz nesıe reıtıngi mindettemesi «A-3»-ten «A-2»-ge deıin arttyrylǵan.

«Egemen Qazaqstan» gazetinde jarııalanǵan kelesi maqala bıyl 1-2 jeltoqsa­nda Astana qalasynda ótken EQYU-ǵa múshe elder memleket jáne úkimet basshylarynyń Sam­mıtine arnalǵan. Taqyryby -«Helsınkıden Astanaǵa deıin: Beıbit damýdyń kúrdeli joly». «Bul forým tek Qazaqstan úshin ǵana emes, sony­men qatar, uıymnyń barlyq mú­she­leri úshin de asa mańyzdy oqı­ǵa boldy. Alǵash ret bul uıym­nyń azııalyq bóliginde jáne Eýrazııa qurlyǵy­nyń ortalyǵynda budan keıingi kezeńdegi beıbit damýdyń baryn­sha tıimdi jol­da­ryn aıqyndaý maq­satynda álem memleketteri men halyqaralyq uıymdardyń joǵary ókilderi arasynda tolyq kólemdi saıası pikir almasý júzege asty. EQYU-nyń Astana Sammıti tek álem­dik muhıttardyń sý ke­ńis­tik­teri arqyly ter­rıtorııalyq shektelgen, barynsha aýqymdy koordınattarda teńdestirilgen qa­rym-qatynastardyń damýynyń jańa kezeńiniń bastaýy boldy», - delingen maqalada.

***

«Aıqyn» gazetiniń búgingi nómirinde «El turaqtylyq pen tatýlyqty qalaıdy», degen taqyryppen maqala basyldy. «Jańa jyl qarsańynda Erlan Sydyqov bastaǵan bastamashyl toptyń ókilderi jýrnalıstermen baspasóz máslıhatyn ótkizdi. Onyń aıtýy boıynsha, búginge deıin respýblıkanyń ár aımaǵynan 314 621 qol jınalǵan. Qol jınaý barysynda elimizdiń Shyǵys Qazaqstan jáne Almaty oblystary alda keledi. Naqtyraq aıtsaq, Kendi Altaı óńiriniń jurtshylyǵy 34 myń qol jınasa, al Almaty 33 237 qol jınaǵan. Qańtardyń 10-11-ine deıin Qazaqstan halqynyń 2 mıllıon qolyn jınaýǵa kámil senemiz, - dedi Erlan Battashuly. Prezıdent ókilettiligin 2020 jylǵa uzartý jóninde referendýmdy ótkizý bastamasyna Qazaqstanda turatyn san alýan ulttyń ókilderi belsene aralasyp, yntaly top ókilderine telefon arqyly habarlasyp, ystyq yqylastaryn bildirýde»,-delingen maqalada.

«2010 jyl qandaı oqıǵalarmen este qaldy?». «Aıqyn» gazetiniń búgingi nómirinde osyndaı taqyryppen shyqqan maqalada elimizge esimderi tanymal birqatar azamattar ótip bara jatqan barys jylynyń aıshyqty oqıǵalaryna qatysty ózderiniń pikirlerin bildirgen. Máselen, Zań ǵylymdarynyń doktory, akademık Cultan Sartaevtyń pikirinshe, 2010 jyl bizdiń respýblıkamyz úshin óte qýanyshty ári umytylmas, sondaı-aq baqytty jyl boldy. Óıtkeni elordamyz - Astanada EQYU-nyń sammıti ótti. Astana sammıti arqyly búkil álemge Qazaqstannyń órkenıetti hám mádenıetti el ekendigi aıqyn tanydy. Bul - bizder, qazaqstandyqtar úshin úlken mártebe! Osynaý mártebeli halyqaralyq shara elimizdiń kóshbasshysy, Elbasy Nursultan Ábishuly Nazarbaevtyń saıası, ekonomıkalyq-áleýmettik, mádenı máselelerdi sheshýdegi kósemdigi men sheshendigin, qaıratkerligi men kóregendigin jáne qarym-qabiletiniń asa zor ekendigin aıqyn ańǵartty. Taǵy bir oqıǵa, respýblıka turǵyndarynyń Elbasyǵa úlken senim artyp, onyń prezıdenttik ókilettigin uzartý jóninde jalpyhalyqtyq referendým ótkizý týraly sheshim qabyldaýy der edim. «Óz basym muny ulaǵatty da, parasatty sheshim dep baǵalaımyn. Óıtkeni bul - táýelsiz qazaq eliniń ekonomıkalyq-áleýmettik, mádenı damýy jolyndaǵy ıgilikti istiń jarqyn bastamasy dep bilemin!», - deıdi akademık.

Ekonomıka ǵylymdarynyń doktory Orazáli Sábdenniń paıymdaýynsha, 2010 jyl elimizdiń saıası ómirinde tarıhı oqıǵalarǵa toly boldy. Birinshi - Qazaq eli quramyna álemdegi 56 el kiretin EQYU-nyń (OBSE) tizginin qolyna aldy. Ekinshi osynaý halyqaralyq uıymdy «tizgindep» qana qoımaı EQYU-nyń Astanada ótkizip, tolǵaqty máselelerdiń talqylanýyna túrtki boldy. Elimiz tarıhynda tuńǵysh ret Astana deklaratsııasy qabyldandy. Bul - Qazaqstan úshin asa úlken ári mańyzy zor tarıhı oqıǵa! Odan soń bastamashyl halqymyz Elbasy Nursultan Nazarbaetyń prezıdenttik ókilettigin 2020 jylǵa deıin uzartýǵa baılanysty referendým ótkizý qajettigi týraly sheshim qabydap otyr. Bul elimizdiń álemdik saıasat sahnasynda bıikten kórinýine zor múmkindik beredi.

Sondaı-aq osy maqala aıasynda Qazaqstannyń halyq artısi: Nurjuman Yqtymbaevtyń jáne Májilis depýtaty Gúlmıra Esimbaevanyń da pikirlerin bile alasyzdar.

***

«Memleket basshysynyń atyna el azamattarynan Astana Sam­mıtiniń joǵary deńgeıde ótýine jáne Táýelsizdiktiń 19 jyl­dy­ǵyna baılanysty quttyqtaýlar tolassyz kelip túsýde», dep jazady «Kazahstanskaıa pravda» gazeti. Basylymda jazylǵanyndaı, Memleket basshysynyń atyna Almatydaǵy B.Momyshuly atyn­da­ǵy №131 mektep-lıtseıiniń 3-synyp oqýshysy Jambyl Dúı­se­novtiń Elbasyna arnaǵan «Perishte-tilek» atty óleńi kelip tús­ti. Sondaı-aq Elbasynyń atyna Almaty qa­lasynan A.Qyryqbaı, A.Aqa­no­va, G.Baıbaqova, B.Qulshynbaev, G.Kóbeeva, M.Sadýaqasova, t.b. jastar atynan joldanǵan qut­tyq­taý hatta Astanada EQYU Sam­mıtiniń ótýi Táýelsizdiktiń naqty jemisi ekeni aıtylady. Sondaı-aq Jambyl oblysynyń turǵyny Z.Qamshybaev óz hatynda EQYU Sammıtin tabysty ótkizýdiń ná­tıjesinde qazaq halqyn kúlli álem tanyǵanyn maqtanyshpen jazady. Al Taraz qalasynyń tur­ǵyny A.Dúısenbekova EQYU Sammıti joǵary deńgeıde ót­ke­nin aıtyp, Elbasy jáne Táýel­siz­dik týraly jyr joldaryn jol­daǵan.