El ordasynan eldiń barlyq óńirine qaraı sapaly avtomobıl joldaryn kóptep salý qajet - N.Nazarbaev

ASTANA. QazAqparat - Nursultan Nazarbaev aýqymdy ınfraqurylymdyq damý baǵdarlamasy jarııalanatynyn málimdedi. Bul jaıynda Prezıdent Astana qalasy aktıvimen kezdesý barysynda aıtty.

«Bizge el ordasynan eldiń barlyq óńirine qaraı sapaly avtomobıl joldaryn kóptep salý qajet. Qurylys jumys oryndary men kásiporyndar tapsyrysyn qamtamasyz etedi, el ekonomıkasynyń kólemin kemitpeýge múmkindik beredi. Úkimet osy máselemen aınalysyp jatyr, ony júzege asyrýǵa Astana da atsalysýy tıis», - dedi Qazaqstan Prezıdenti.

Budan bólek, Memleket basshysy áleýmettik turaqtylyq pen barlyq azamattardyń teńdigi elimizdiń myzǵymas ustanymdary bolyp qala beretinine toqtalyp ótti. «Keıbir qaıratkerler báriniń atyn aýystyrýǵa, kósheler men mekemelerdiń ataýyn bir tilde jazýǵa beıim. Muny toqtatqan jón. Taǵy da qaıtalaǵym keledi: patrıottyǵyńdy onyń qajet emes kezderinde kórsetýge umtylýdyń keregi joq. Konstıtýtsııada tilder men etnostarǵa qatysty barlyq normalar naqty kórsetilgen. Bul - bizdiń artyqshylyǵymyz, bizdiń kópultty turaqty memleket retindegi brendimiz», - dedi Nursultan Nazarbaev.