El óńirlerinen jınalǵan 200 ustaz ıntellektýaldy saıysta synalady

ASTANA. KAZINFORM – Elordada tuńǵysh ret «Oqý jáne matematıkalyq saýattylyq: tabysty sınergııa» taqyrybynda respýblıkalyq ıntellektýaldy saıysy ótip jatyr.

Baıqaýǵa óńirlerde júzden júırik shyqqan 100 qazaq tili men ádebıeti jáne 100 matematıka páni muǵalimi kelgen. Saıys, túsinip oqý, logıkalyq oılaý, dál esepteý baǵyttary boıynsha ótip jatyr. 

- Qazaq tili men ádebıeti jáne matematıka páni muǵalimderi arasyndaǵy bul baıqaý respýblıkalyq deńgeıde tuńǵysh ret ótip jatyr. Jalpy fýnktsıonaldyq saýattylyq máselesi - orta bilim berý salasyndaǵy bilim sapasyn kóterý maqsatynda 2016 jylǵy reforma negizinde engizilgen úlken baǵyt. Sonyń nátıjesinde jaqsy ilgerleýshilik bar. Mysaly, matematıkalyq saýattylyqtan Qazaqstan oqýshylary 83 memleket qatysqan álemdik baıqaýda 50-shi oryn, oqý saýattylyǵynan 64-shi oryn aldy. Sondyqtan balalardyń oqý saýattylyǵy tikeleı bilim sapasyna áser etetin daǵdy bolǵandyqtan, Oqý-aǵartý mınıstrligi oqý saýattylyǵyna erekshe mán berip otyr. Oqýshy tapsyrmany jaqsy túsiný úshin, aldymen onyń mátinin anyq túsinýi kerek. Balalardy soǵan daǵdylandyrý úshin, aldymen pedagogterdi shyńdap shyǵýymyz qajet. Sol maqsatpen mınıstrlik pedagogterdiń biliktiligin arttyrý jumysynda da oqý saýattylyǵyna, matematıkalyq saýattylyǵyna basymdyq berip júr. Mine osydan keıin oqý jáne matematıkalyq saýattylyq ekeýi qosylǵanda tabysty sınergııa berý kerek degen oı týdy, - deıdi Oqý-aǵartý mınıstrligi Orta bilim berý komıtetiniń tóraǵasy Qanybek Jumashev.

Aıta keteıik, kelesi oqý jylynan bastap bastaýysh jáne orta synyp oqýshylary jańa bilim standartyna kóshedi.