El óńirlerinde sıyr etiniń baǵasy qanshalyqty ózgerdi
ASTANA. KAZINFORM – Saýda jáne ıntegratsııa vıtse-mınıstri Qaırat Tórebaev el óńirlerinde sıyr etiniń baǵasy óskenin aıtty.
Búgin Senattyń jalpy otyrysynan keıin tilshiler qazir elimizdiń ońtústik óńirlerinde sıyr eti baǵasynyń ósýi men Ózbekstanǵa mal eksportynyń artýyna qatysty suraq qoıdy.
Óz kezeginde vıtse-mınıstr Qazaqstan dástúrli túrde kórshi elge et eksporttaıtynyn aıtty.
- Jyl saıyn Ózbekstanǵa 20 myń tonnaǵa jýyq sıyr etin eksporttaımyz. Resmı derekterge sáıkes, 2025 jyldyń basynan beri sıyr eti baǵasynyń ındeksi 8,4 paıyzǵa ósti, bir aptada baǵanyń ósýi 0,6 paıyzdy qurady. Jyl basynan beri barlyq 20 óńirde baǵanyń ósýin baıqadyq. Oblystarda ártúrli deńgeıde boldy, keıbirinde birshama az somada ósti. Al Túrkistan oblysynda 3 paıyz shamasynda ósim boldy. Jalpy, elimiz boıynsha ortasha baǵa 2800 teńge deńgeıinde, - dedi Qaırat Tórebaev.
Budan buryn habarlanǵandaı, bıyl 26 aqpanda QR Saýda jáne ıntegratsııa mınıstri Arman Shaqqalıev sıyr etiniń baǵasy ne sebepti kúrt artqanyn túsindirdi.
Onyń aıtýynsha, ishki naryqty qamtamasyz etý aıasynda kórshi Ózbekstanǵa iri qara mal eti eksporttalmaı jatyr.
Eske salsaq, Aýyl sharýashylyǵy mınıstrligi byltyrǵy et eksportyna qatysty túsinik berdi.
Sıyr etiniń negizgi eksporty Ózbekstanǵa baǵyttalǵan.