El óńirlerinde rıeltor qyzmeti qansha turady
PETROPAVL. KAZINFORM - Búginde páter satyp alý nemese satý kezinde rıeltor kómegine júginý qalypty jaǵdaıǵa aınaldy. Elimizdiń qalalarynda bul qyzmettiń quny ártúrli. Kazinform agenttiginiń tilshisi óńirlerdegi baǵany salystyrdy.
Qyzmettiń qunyna birneshe faktor áser etedi: eń aldymen óńirdegi turǵyndardyń tabys deńgeıi, naryqtaǵy jaǵdaı, sondaı-aq agenttiktiń bedeli men rıeltordyń tájirıbesi mańyzdy ról atqarady. Sondyqtan bir qalada qyzmet quny 300 myń teńgeden bastalsa, basqa óńirlerde ol 500-600 myń teńgege deıin jetýi múmkin.
Taǵy bir ereksheligi, eger páter quny 20 mln teńgeden assa, erekshe nemese qymbat baspana bolsa, onda rıeltordyń komıssııasy múlik baǵasynyń belgili bir paıyzyna baılanysty esepteledi.
Máselen, Astana qalasynda páter satyp alý nemese satý kezinde rıeltor qyzmeti kóbine 1-3% aralyǵynda nemese turaqty baǵa – 300-450 myń teńge mólsherinde belgilengen. Al qymbat turǵyn úı segmentinde komıssııa 2-5% deıin ósýi múmkin.
Atyraý, Almaty men Petropavlda da ortasha baǵa uqsas - shamamen 500 myń teńge nemese 1-5% aralyǵynda.
Basqa óńirlerde: Túrkistan, Shymkent, Semeı, Óskemen, Qostanaı, Kókshetaý, Taraz, Qaraǵandyda rıeltor kórsetken qyzmeti úshin ortasha eseppen 300 myń teńge alady.
Taldyqorǵanda qyzmet quny 250 myń teńgeden bastalsa, Pavlodarda eń tómengi baǵa 350 myń teńge shamasynda.
Keıbir qalalarda rıeltordyń qyzmet aqysy múliktiń baǵasyna qaraı esepteledi. Mysaly, Aqtóbede quny 15 mln teńgege deıingi páterler úshin shamamen 150 myń teńge alynsa, odan qymbat baspanalarǵa baǵa 2% shamasynda belgilenedi. Shymkentte kóbine satyp alýshy men satýshynyń árqaısysynan 1% alynady, al kúrdeli mámilelerde bul kórsetkish 2-6% deıin jetýi múmkin.
Oralda páterdi satýǵa kómekteskeni úshin rıeltorlar eń keminde 200-300 myń teńge alady.
Qymbat baspanalarǵa bólek tarıf qoldanylady - mundaı jaǵdaıda komıssııa páter qunynyń shamamen 1-3% quraıdy.
Al Qyzylordada quny 20 mln teńgege deıingi úılerge shamamen 200 myń teńge alynsa, odan qymbat nysandar boıynsha múlikti satyp alýshydan 1% kóleminde komıssııa ustalady.
Páterdi jaldaý naryǵy
Jaldaý naryǵynda da komıssııa ártúrli. Kóp jaǵdaıda rıeltorlar bir aılyq jaldaý qunynyń 50-100% deıin nemese 10-30% aralyǵynda aqy alady. Mysaly, Tarazda bul kórsetkish 10% bolsa, Astanada 20% bastalady, Aqtaýda - 15%, basqa qalalarda kóbine bir aılyq jaldaý aqysyna teń keledi.
Ipotekalyq brokerlerdiń qyzmeti Qazaqstanda áli tolyq damymaǵan, tipti keı óńirlerde múlde joq deýge bolady. Qostanaıda maman qyzmeti 150-450 myń teńgege baǵalanǵan. Al, ádette olardyń qyzmet aqysy nesıe somasynyń 0,5-1% mólsherinde nemese 50-200 myń teńge aralyǵynda belgilenedi. Keı jaǵdaılarda bul qyzmetti bank menedjerleri kórsetedi nemese brokerlerge bankter men agenttikter tóleıdi.
Jalpy alǵanda, Qazaqstanda rıeltorlyq qyzmettiń quny kelisimge baılanysty qalyptasady jáne naqty bir standart joq. Sondyqtan mámile jasamas buryn qyzmettiń sharttaryn, baǵasyn jáne rıeltordyń qandaı jumys atqaratynyn aldyn ala naqtylap alǵan jón. Bul artyq shyǵynnan saqtanýǵa múmkindik beredi.
Buǵan deıin Qazaqstan qalalarynda kartop baǵasy qansha turatynyn jazǵan edik.