El óńirlerinde kilem jýý qyzmetiniń quny qansha
ASTANA. KAZINFORM – Kóktemgi maýsym bastalysymen elimizde kilem jýý qyzmetine suranys arta túsedi. Úı ishin retke keltirip, tazalyqqa mán beretin osy kezeńde turǵyndar mundaı qyzmetke jıi júginedi. Alaıda onyń quny óńirge qaraı ártúrli qalyptasqan.
Elimizdiń soltústik jáne shyǵys óńirlerinde baǵa deńgeıi birshama joǵary. Máselen, Petropavl qalasynda kilem jýý quny bir sharshy metrine 1 000-1 200 teńge aralyǵynda bolsa, Óskemende 1 000 teńgeden bastalady. Qostanaı men Oral qalalarynda da baǵa shamamen 900-1 000 teńge.
Al iri qalalarda qyzmet aqysy ortasha deńgeıde. Astana men Almatyda kilem jýý baǵasy 700-1 000 teńge aralyǵynda. Qaraǵandy, Pavlodar jáne Qonaev qalalarynda bul kórsetkish 650-900 teńgeni quraıdy. Atyraýda — 600-800 teńge, al Aqtóbede — 550-900 teńge shamasynda.
Ońtústik óńirlerde bul qyzmet túri salystyrmaly túrde qoljetimdi. Taraz qalasynda kilem jýý quny 450-600 teńge bolsa, Túrkistanda 350 teńgeden bastalady. Qyzylorda men Taldyqorǵanda baǵa 500-800 teńge aralyǵynda. Al Shymkent qalasynda baǵa aıyrmashylyǵy aıqyn — 500 teńgeden 2 000 teńgege deıin jetedi. Bul qyzmet sapasy men qosymsha usynystarǵa baılanysty.
Mamandardyń aıtýynsha, kilem jýý baǵasy eń aldymen onyń matasyna baılanysty. Sıntetıkalyq talshyqtan jasalǵan kilemderdi tazalaý jeńil bolǵandyqtan, olardyń quny da tómen. Al jún men jibekten toqylǵan buıymdar uqypty kútimdi qajet etedi. Mundaı kilemderdi jýý barysynda arnaıy quraldar qoldanylyp, keıde qolmen tazalaý tásilderi paıdalanylady. Sol sebepti olardyń baǵasy joǵary bolady.
Sonymen qatar, qolmen toqylǵan kilemderge qyzmet kórsetý jeke qarastyrylady. Olardyń tyǵyzdyǵy men toqylý ereksheligi ártúrli bolǵandyqtan, tazalaý tásili de ózgeshe. Soǵan sáıkes mundaı qyzmet túriniń quny da ádetten qymbat bolýy múmkin.
Baǵaǵa áser etetin ózge de jaıttar bar. Atap aıtqanda, kilemniń qanshalyqty lastanǵany, túginiń uzyndyǵy, daqtardy ketirý qajettiligi, sondaı-aq jetkizý, keptirý jáne bakterııaǵa qarsy óńdeý sııaqty qosymsha qyzmetter jalpy qunǵa yqpal etedi.
Jalpy alǵanda, óńirlerdegi baǵa aıyrmashylyǵyna qaramastan, elimizde kilem jýý qyzmeti turǵyndar úshin qoljetimdi. Al naryqtaǵy básekelestik tutynýshylarǵa baǵa men sapanyń ońtaıly úılesimin tańdaýǵa múmkindik beredi.
Aıta keteıik, buǵan deıin Qazaqstan qalalaryndaǵy avtokólik jýý qyzmetteriniń baǵasy týraly da aqparat jarııalanǵan bolatyn.