El óńirlerinde qaldyqtardy energetıkalyq kádege jaratý jobalary júzege asady - Úkimet
ASTANA. KAZINFORM – Premer-mınıstri Oljas Bektenov qaldyqtardy energetıkalyq kádege jaratý jobalary Qazaqstannyń birqatar óńirinde júzege asyrylatynyn aıtty.
- Qaldyqtardyń jınalyp qalýy – álemdegi eń ózekti ekologııalyq máselelerdiń biri. Birikken Ulttar Uıymy men Dúnıejúzilik Banktiń esepterine súıensek, jyl saıyn 2 mlrd tonnadan astam turmystyq qatty qaldyq paıda bolady. Olardyń basym bóligi qaıta óńdelmeıdi.
Sarapshylardyń baǵalaýynsha, 2050-shi jylǵa qaraı bul kórsetkish eki ese ulǵaıyp, jylyna 3,8 mlrd tonnaǵa jetedi. Memleket basshysy elimizdegi ekologııalyq ahýaldy jaqsartý maqsatynda naqty sharalar qabyldaý qajettigin únemi aıtyp keledi. Ol úshin qaldyqtardyń barlyq túrin tolyqtaı qaıta óńdeý kerek. Bizde ol turmystyq qaldyqtardyń jalpy kóleminiń shamamen 25 paıyzyn ǵana qurap otyr. Osy máselelerdi sheshý úshin Astana, Almaty jáne Shymkent qalalarynda qaldyqtardy energetıkalyq kádege jaratý jobalary iske asyrylyp jatyr. Qazir ınvestorlar anyqtalyp, olarmen tıisti kelisimder jasaldy, - dedi O. Bektenov.
Onyń aıtýynsha, aldaǵy ýaqytta bul tájirıbe ózge aımaqtarǵa da taratylatyn bolady.
- Qaldyqtardy basqarý júıesin jaqsartý úshin jeńildetilgen qarjylandyrý tetigi arqyly 185 mlrd teńge qarastyrylǵan. Búginde 60 joba maquldandy, onyń 22-sine qarajat bólindi. Ekologııa mınıstrligi ákimdiktermen birge osy jobalardy júzege asyrýy kerek. Sondaı-aq ónerkásiptik, medıtsınalyq jáne basqa da qaldyqtarǵa qatysty tıisti sheshim qabyldaý qajet. Qaldyqtardyń barlyq túrlerin basqarý Tujyrymdamasyn iske asyrý ekologııalyq jáne sanıtarııalyq-epıdemıologııalyq qaýipsizdikti qamtamasyz etý úshin naqty baqylaý men boljam jasaý júıesin qalyptastyrýǵa múmkindik beredi. Bul qaıta óńdeý jáne qaıta paıdalanýǵa baǵyttalǵan qaldyqtardy basqarý salasynyń damýyn yntalandyrady. Atalǵan tásil Prezıdentimizdiń tabıǵatty aıalaý jónindegi ekologııalyq mádenıetti qalyptastyrýǵa baǵyttalǵan «Taza Qazaqstan» bastamasynyń talaptaryna saı keledi, - dedi Úkimet basshysy.
Onyń sózine qaraǵanda, salany tsıfrlandyrýǵa, qaldyqtardyń tsıfrlyq esebin júrgizýge, olardyń qozǵalysyn, jınaqtalýyn jáne kádege jaratylýyn baqylaýǵa erekshe nazar aýdarý kerek. Qaldyqtardy basqarý salasynyń ınvestıtsııalyq áleýeti joǵary, ol bizde ázirge tıisti deńgeıde paıdalanylmaı otyr.
Budan buryn habarlanǵandaı, búgin Úkimet otyrysy QR Ekologııa jáne tabıǵı resýrstar vıtse-mınıstri Jomart Álıev qaldyqtardyń barlyq túrin basqarý jónindegi tujyrymdama jobasyn tanystyrdy.
Aıta keteıik, elimizdiń úsh iri qalasynda qoqys jaǵatyn zaýyttar salynady.