Banan el óńirlerinde neshe teńgeden satylyp jatyr - agenttik sholýy
ASTANA. KAZINFORM – Elimizde bir keli banannyń baǵasy orta eseppen 800-1100 teńge. «QazAqparat» agenttiginiń tilshisi ekzotıkalyq jemistiń baǵasyna sholý jasap kórdi.sholý
Qazaqstanǵa banan kóbine Ekvadordan ákelinedi. Sórelerde tanymal Kavendısh sorty basym. Plantan da kezdesedi. Shaǵyn banandar da ara-tura sóreden oryn tabady. Olardyń quny Kavendıshten eki-úsh ese qymbat. Mysaly, Almatyda ár kelisin 3600 teńgege, Qostanaıda 1560 teńgege satyp alýǵa bolady.
Óńirlerde qarapaıym banan kem degende 800-900 teńgeden satylýda. Atap aıtsaq, ekzotıkalyq jemisti mundaı baǵamen Shymkent, Túrkistan, Taldyqorǵan, Kókshetaý, Qaraǵandy, Petropavl, Qostanaı, Astana, Aqtóbe, Oral, Semeı, Taraz qalalarynan satyp alýǵa bolady. Al, Pavlodar, Aqtaý, Qonaev, Óskemen, Jezqazǵan jáne Almaty qalalarynda baǵa 950-1000 teńge aralyǵynda. Atyraýda baǵa 1000 teńgeden asyp tústi.
Eń arzan banandy Qyzylordada tabasyz. Kelisi 700 teńgeden satylyp jatyr. Al Almatyda ınternet-dúkenderden banandardy bir-bireýden satyp alýǵa bolady. Árqaısysynyń baǵasy 221 teńgege baǵalanady.
Byltyr Túrkistan oblysynda banan ónerkásiptik kólemde ósirile bastaǵany belgili. «GenGroup Qazaqstan» túrik kompanııasy aımaqta banan aǵashtary ósiriletin 5,3 gektar jerge jylyjaı keshenin saldy. Banan sorty arnaıy ósirilip, Qazaqstannyń klımattyq jaǵdaıyna beıimdelgen. Olar jylyna 1 myńǵa deıin banan óndirýdi kózdep otyr. Bıyl alǵashqy 600 tonna jınalmaq. Otandyq banandar áýeli Shymkent pen Almatynyń bazarlarynda paıda bolady. Keıin elimizdiń basqa aımaqtaryna jetkizý josparlanyp otyr. Aıtpaqshy, baǵasy ımporttyq baǵadan tómen bolady dep ýáde etilgen.
Globalproductprices.com portaly 79 eldegi banan baǵasyn jınaqtaıtynyn atap ótken jón. Olardyń Naýryz aıyndaǵy reıtıngi boıynsha Qazaqstandaǵy banan baǵasy ortasha eseppen 1025 teńgeni qurap (shamamen $2,3), 14-shi orynǵa jaıǵasqan.
Sáýir aıynyń qorytyndysy boıynsha QR Ulttyq statıstıka bıýrosy banannyń ortasha baǵasyn 987 teńge dep kórsetti. Eń arzan baǵa Qaraǵandyda tirkeldi – kelisi 814 teńge. Al eń qymbat banan Aqtaýda – 1195 teńge.
Al Numbeo.com maýsym aıynyń basyndaǵy málimetterdi usyndy. Portal reıtıngi boıynsha elimizde banannyń ortasha quny 933 teńgeni (2,09 dollar) qurap otyr. 95 eldiń ishinde Qazaqstan bul kórsetkish boıynsha 20-orynǵa turaqtaǵan.
