El óńirlerinde avtokólikti tehnıkalyq baıqaýdan ótkizý qansha turady
ASTANA. KAZINFORM – Elimizde 7 jyldan joǵary júrgen avtokólikti tehnıkalyq baıqaýdan ótkizý kerek. Osy oraıda Kazinform agenttigi tehnıkalyq baıqaýdan ótkizýdiń erejeleri men kezeńi jáne baǵasyna sholý jasaǵan edi.
Erejeler, merzim jáne aıyppul
Dıagnostıkalyq karta beriletin tehnıkalyq baıqaý – Qazaqstan aýmaǵynda tirkelgen barlyq avtokólik quraldary úshin mindetti. Bul tekserý jalpyǵa ortaq paıdalanylatyn joldardaǵy qaýipsizdikti qamtamasyz etý úshin qajet.
Sonymen qatar, sheteldik mehanıkalyq kólikter men tirkemeler de «Jol qozǵalysy týraly» Zańnyń 88-babyna sáıkes tekserýden ótýi kerek.
Jeti jyldan asqan (shyǵarylǵan jylyn qosa alǵanda) kásipkerlik úshin paıdalanylmaıtyn jeńil jeke avtokólikterdi ár 12 aı saıyn tehnıkalyq baıqaýdan ótkizý mindetti.
Jeńil avtomobılder M1 sanatyna jatady - bul jolaýshylardy tasymaldaıtyn jáne júrgizýshi ornynan basqa, 8 orynnan aspaıtyn avtomobılder.
Bıyl 2016 jylǵy avtomobılder tehnıkalyq baqylaýǵa jatady.
«12 aı» erejesi qaýipti júkterdi tasymaldaýǵa arnalǵan jáne jabdyqtalǵan kólikterdi qospaǵanda, N1-3, O1-4, L1-7, G sanatyndaǵy avtomobılderge, arnaıy jáne mamandandyrylǵan kólikterge de qatysty.
Al avtomobıl salasyndaǵy kásipkerlik qyzmette paıdalanylatyn M1 sanattaǵy, M2, M3, N sanattaǵy, adamdardy tasymaldaý úshin jabdyqtalǵan, sondaı-aq qaýipti júkterdi tasymaldaýǵa arnalǵan jáne jabdyqtalǵan M1, N1-3, jáne O1-4 sanattaryndaǵy kólik quraldary 6 aı saıyn tehnıkalyq baıqaýdan ótýi tıis.
Tehnıkalyq baıqaýdan ótý merzimin biryńǵaı aqparattyq júıesiniń saıty arqyly tekserýge bolady.
Memlekettik nemese mindetti tehnıkalyq baıqaýdan ótpegen kólik quralyn basqarǵany úshin QR «Ákimshilik quqyq buzýshylyq týraly» kodeksiniń 590-babyna sáıkes 5 AEK (2024 jyly 18 460 teńge) mólsherinde aıyppul tóleýge týra keledi. Eger aıyppul salynǵannan keıin bir jyl ishinde quqyq buzýshylyq túzetilmese, onda aıyppul 20 AEK-ke ósedi.
Protsedýranyń ózi nebári 15 mınýtty alady. Ár qalada birneshe tehnıkalyq ortalyq núkteleri bar.
Sonymen qatar, «tehnıkalyq tekserýdiń dıagnostıkalyq kartasy» tsıfrlandyrylǵan jáne EgovMobile-daǵy jeke kabınette saqtalady. Sandyq qujat tekserýshi organdardyń derekqorynda saqtalady jáne ony onlaın rejımde tekserý múmkindigi bar.
Sheteldik nómirleri bar avtomobılder úshin Qazaqstan aýmaǵyna kirgen sátten bastap ketkenge deıin 90 kúnnen artyq bolsa, mindetti túrde tehnıkalyq baıqaý júrgiziledi. Sheteldik avtokólikter úshin Qazaqstanda 1815 tehnıkalyq qyzmet kórsetý ortalyǵy jumys isteıdi.
Qandaı qujattar qajet?
Mindetti tehnıkalyq baıqaýdan ótý úshin avto ıesi tehnıkalyq baıqaý operatoryna avtokóligi men onyń memlekettik tirkeý týraly kýálikti kórsetýi tıis. Salyq, saqtandyrý jáne tehnıkalyq tólqujat sııaqty qalǵan derekterdi jalpy baza arqyly baqylaýǵa bolady, bastysy - memlekettik nómirdiń bolýy jáne onyń tehnıkalyq pasportqa sáıkestigi.
Avtokólikti tekserý tizimine ne kiredi
Kelesi parametrlerdi tekserińiz:
— Tejegishti basqarý
— Rýldi basqarý
- Áınektiń kórinisi
- Syrtqy jaryqtandyrý qurylǵylary
- Dóńgelekter, shınalar, aspa
- Gazdaǵy zııandy zattardyń mólsheri
- Shassı toraptary men agregattarynyń bekitpeleriniń jaı-kúıi men jumys isteýi
- Basqa da jabdyqtardyń jaı-kúıi men jumys isteýi (qaýipsizdik beldikteri, spıdometr, alǵashqy kómek qobdıshasy, órt sóndirgish jáne t. b.).
Tehnıkalyq qyzmet kórsetý ortalyqtaryndaǵy baǵa 3000 teńgeden 7000 myń teńgege deıin barady.
Tómendegi ınfografıkadan óńirlerindegi ortasha baǵany keltirdik.
