El óńirlerinde ashylatyn jańa kazınolarǵa Qazaqstan azamattary kire almaıdy
ASTANA. KAZINFORM – Elimizdiń basqa da óńirlerinde ashylatyn jańa kazınolarǵa tek shetel azamattarynyń kirýine ruqsat etiledi. Bul týraly QR Týrızm jáne sport mınıstriniń orynbasary Serik Jarasbaev málim etti.
Búgin Senattyń jalpy otyrysynan keıin tilshiler el óńirlerinde oıyn bıznesin ornalastyrýǵa ruqsat etiletin aýmaqtardyń tizbesin keńeıtý normasyna qatysty suraq qoıdy. «Búgin Senatta maquldanǵan zań aıasynda birneshe óńirde ashylatyn kazınolarǵa tek shetel azamattarynyń kirýine ruqsat etilgen. Osy oraıda bul kazınolarǵa Qazaqstan azamattaryn ótkizbeýdi kimder baqylaıdy?», - dep surady jýrnalıster.
Óz kezeginde vıtse-mınıstr jańadan ashylatyn kazıno ortalyqtarynyń ózderine jaýapkershilik júkteletinin aıtty.
– Jalpy, qazirdiń ózinde kazınoǵa kirý úshin adamdardan mindetti túrde qujattar (jeke kýálik nemese tólqujat) suraıdy. Osy arqyly baza boryshkerler men lýdomandardy anyqtaıdy. Dál sondaı normany jańadan ashylatyn kazınolarǵa engizemiz. Bul turǵyda shetel nemese Qazaqstan azamattaryn anyqtaý tetigi bolady, ıaǵnı el azamattaryna jańa kazınolarǵa kirýge tyıym salynady. Elektrondy júıe kómegimen bul tekserýlerdi kazınonyń ózi iske asyrady, - dedi Serik Jarasbaev.
Onyń aıtýynsha, kazınoǵa zańsyz kirýge talpynǵandarǵa qomaqty somada aıyppul salynady. Al eger kazınonyń ózi zańsyz áreketter jasasa, onda lıtsenzııasy qaıtarylady.
Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine týrıstik salany jáne balalar sportyn qoldaý máseleleri boıynsha ózgerister men tolyqtyrýlar engizý týraly» Zań maquldandy.
Zańmen elimizdiń oıyn bıznesin ornalastyrýǵa ruqsat etiletin aýmaqtardyń tizbesi keńeıtiledi. Burynǵy Qapshaǵaı, Býrabaıdan bólek, endi Mańǵystaý, Jetisý, Almaty jáne Shyǵys Qazaqstan oblystarynyń týrıstik mańyzy bar aımaqtarynda jańa oıyn zonalarynyń qurylýy óńirlerge ınvestorlar men sheteldik saıahatshylardy tartýdyń qosymsha tetigine aınalady. Bul rette zańda mańyzdy áleýmettik jáne ekonomıkalyq tosqaýyl qoıylǵan: jańadan belgilengen aýmaqtardaǵy oıyn mekemelerine tek sheteldik azamattardyń kirýine ruqsat beriledi.