El óńirleri qandaı ónimderimen maqtana alady

ASTANA. KAZINFORM –Ádilet mınıstrliginiń resmı ókili Talǵat Ýálı Qazaqstan óńirleri qandaı ónimderimen maqtana alatyndyǵyn aıtty.

- Ádilet mınıstrliginde Qazaqstandyq kásipkerlerdiń 100-den astam geografııalyq kórsetkishteri tirkeldi. Geografııalyq kórsetkish – bul belgili bir geografııalyq aımaqtan shyqqan jáne sol jerdiń erekshelikterine baılanysty biregeı qasıetterge ıe zııatkerlik menshik nysany. Ár óńir óz ónimderimen maqtana alady.

Mysaly, Jambyl oblysynda ondaǵan jyldar boıy óndirilip kele jatqan Býrnen irimshikteri, maıy jáne súti joǵary baǵalanady.

Mańǵystaý oblysy «Munaıly shujyǵy», «Mańǵystaý qazysy» syndy dástúrli delıkatesterimen erekshelenedi.

Al Shyǵys Qazaqstan óziniń Katonqaraǵaı baly arqyly tanymal. Ol eldegi bal eksportynyń 70 paıyzyn quraıdy.

Soltústik Qazaqstan «Sergeev» maıy, irimishigi, qurt jáne Petropavldyń táttilerimen tanymal, - dedi ol Ortalyq kommýnıkatsııalar qyzmetindegi brıfıngte. 

Onyń atap ótýinshe, búginde Qazaqstanda «Almatylyq aport», «Túrkistan» balmuzdaǵy, «Túrkistan» shokolady, «Qaraǵandy» balmuzdaǵy jáne basqa da ulttyq geografııalyq kórsetkishter tirkelgen.

- Geografııalyq kórsetkishterdi damytý Qazaqstannyń ulttyq brendin qalyptastyrýǵa, taýarlardyń álemdik naryqta tanylýyna jáne ınvestıtsııalar tartýǵa, sondaı-aq týrızmdi damytýǵa yqpal etedi. Qazaqstandyq kásipkerlerdi geografııalyq kórsetkishterdi qorǵaý múmkindikterin belsendi paıdalanýǵa, biregeı mádenı jáne tabıǵı murany saqtaýǵa shaqyramyz, - dedi Talǵat Ýálı.

Buǵan deıin elimizde tek bir jerde ǵana shyǵarylatyn, ózindik tarıhy bar ónim zańmen qorǵalatynyn jazǵan edik.