El óńirlerinde turaqtandyrý qorlarynan pııaz satyla bastady – mınıstrlik

ASTANA. QazAqparat - Qazaqstan óńirlerinde turaqtandyrý qorlarynan saýda nysandaryna pııaz jetkizile bastady. Bul týraly Saýda jáne ıntegratsııa mınıstrliginen málim etti, dep habarlaıdy QazAqparat.

Keshe QR SIM Saýda komıteti tóraǵasynyń mindetin atqarýshy Aıdar Ábildabekov Jambyl oblysy ákimdiginiń ókilderimen birge sharýa qojalyqtarynyń qoımalarynda pııazdyń bar-joǵyn jáne jaı-kúıin tekserdi. Anyqtalǵandaı, qazir óńir qoımalarynda 38 myń tonnaǵa jýyq pııaz saqtaýly.

Jambyl oblysy ákimdiginiń Kásipkerlik jáne ındýstrıaldy-ınnovatsııalyq damý basqarmasynyń basshysy Aspandııar Seısebaevtiń aıtýynsha, oblysta pııaz kúzde satyp alynǵan. Búginde bul kókónis 40-qa jýyq saýda oryndaryna kelisi úshin 115 teńgeden jetkizilip jatyr. Al dúkender 128 teńgeden satýda. A.Seısebaev pııaz qory basqa óńirlerge jetkizý úshin de jetkilikti ekenin atap ótti.

Saýda komıteti tóraǵasynyń mindetin atqarýshy Aıdar Ábildabekov Tarazdyń saýda núktelerine, atap aıtqanda, óńirdegi iri «Vkýsnaıa Korzınka» azyq-túlik dúkenderi jelileriniń birine bardy. Dúkender jelisine oblysta 36 saýda núktesi tıesili. Búgingi tańda saýda jelisindegi pııaz qory 21 tonnany quraıdy, onyń 5 tonnasy – dúken sórelerinde, al 16 tonnasy – kásiporyn qoımasynda. Saýda núktelerinde bir keli pııazdyń baǵasy 128 teńgeni quraıdy.