El óńirlerinde shegirtkeden qorǵaý sharalary bastaldy - AShM

NUR-SULTAN. QazAqparat – QR AShM Agroónerkásiptik keshendegi memlekettik ınspektsııa komıtetiniń tóraǵasy Almabek Mars elimiz aýmaǵynda shegirtkege qarsy hımııalyq óńdeý sharalary týraly aıtyp berdi, dep habarlaıdy QazAqparat tilshisi.

«Qazirgi ýaqytta marokko shegirtkesine qarsy hımııalyq is-sharalar Jambyl jáne Túrkistan oblystarynda aıaqtalyp qaldy. 2020 jylǵy 28 mamyrdaǵy jaǵdaı boıynsha óńdelgen kólemi 66,72 myń gektar nemese boljanatyn kólemniń 71,09 paıyzy. Zertteý jáne óńdeý jumystary jalǵasýda. Almaty, Jambyl, Qaraǵandy jáne Pavlodar oblystary ıtalıandyq prýsqa qarsy qorǵaý sharalaryn ótkizýge kiristi», - dedi komıtet tóraǵasy Ortalyq kommýnıkatsııalar qyzmetinde.

Onyń sózine qaraǵanda, basqa aımaqtarda shegirtke zııankesteriniń taralý oshaqtarynyń anyqtalýyna qaraı hımııalyq óńdeý bastalady.

«Jalpy, shegirtkelerge qarsy kúres máselesi Aýyl sharýashylyǵy mınıstrliginiń turaqty baqylaýynda», - dedi ol.

Almabek Marstyń atap ótýinshe, qazirgi ýaqytta Afrıkada sońǵy 25 jyldaǵy shegirtkeniń eń iri kóshi júrip jatyr. BUU-da jándikterdiń belsendiligi egistikterdiń joıylýyna ári janýarlardyń qyrylýyna, sondaı-aq kóptegen elderde jappaı ashtyqqa ákeledi dep qaýiptenedi.

BUU-nyń Azyq-túlik jáne aýyl sharýashylyǵy uıymynyń málimetteri boıynsha, shegirtkeniń taralýy Afrıkanyń kóptegen aımaqtarynda ashtyqtyń sebebi bolýy múmkin. Shegirtkelerdiń buryn-sońdy bolmaǵan kóshi Aýǵanstan, Pákistan, Úndistan jáne Ońtústik Shyǵys Azııanyń basqa elderinde baıqalǵan.

Budan buryn habarlanǵandaı, 2020 jyly 554 myń gektar alańda úıirli shegirtke zııankesteri taralýy múmkin.

Shegirtke zııankesterimen kúres baǵytynda 38,3 mln gektar alqap zertteletin bolady.