El óńirlerinde saılaý quqyǵy men saılaý júıesin nasıhattaýǵa baǵyttalǵan sharalar uıymdastyrylady
ASTANA. Aqpannyń 3-i. QazAqparat - Aqpannyń 4-5-inde QR Ortalyq saılaý komıssııasy «Nur Otan» HDP «Jas Otan» JQ qoǵamdyq birlestigimen el óńirlerinde QR saılaý quqyǵy men saılaý júıesin nasıhattaýǵa baǵyttalǵan sharalar uıymdastyrady.
Bul aqparatty QR Ortalyq saılaý komıssııasynyń baspasóz qyzmeti taratyp otyr.
«Bul sharalar aıasynda jastardyń Qazaqstan Respýblıkasy máslıhattarynyń depýtattarymen, saılaý komıssııalary múshelerimen, múddeli memlekettik organdardyń, buqaralyq aqparat quraldarynyń, saıası partııalardyń jáne olardyń jastar qurylymdyq bólimsheleriniń, qoǵamdyq birlestikterdiń jáne úkimettik emes uıymdardyń ókilderimen beıresmı kezdesýlerin uıymdastyrý kózdelip otyr», delingen baspasóz habarlamasynda.
Sonymen qatar sharalar barysynda Qazaqstan Respýblıkasynyń jasy 16-ǵa tolǵan azamattaryna jeke kýálikter tabys etý rásimi, jas saılaýshylar úshin saılaý zańnamasyn bilý boıynsha synaq ótkiziletin bolady.
Uıymdastyrýshylardyń aldyna qoıyp otyrǵan basty maqsaty - saılaýdyń demokratııalyq ustanymdary men postýlattarynyń elimizdiń mıllıondaǵan azamattarynyń sanasyna berik ornaýyndaǵy rólin ashý, jas saılaýshylardyń Konstıtýtsııamen kepildendirilgen demokratııalyq bostandyqtaryn iske asyrý aıasynda memleketti basqarýǵa tikeleı nemese ózderiniń erkin saılanǵan ókilderi arqyly qatysý quqyqtary men múmkindikterin bildirý jáne túsindirý.
Aıta keteıik, Eýropa elderi saılaýdy uıymdastyrýshylary qaýymdastyǵynyń bastamasymen 2010 jyly aqpannyń 6-synda Dúnıejúzilik saılaý kúni atap ótiledi. Dúnıejúzilik saılaý kúnin atap ótýdegi basty maqsat - demokratııalandyrý protsesiniń turaqtylyǵyn qoǵamdyq sanaǵa sińirý, qoǵamdy saılaý protsesinde qol jetkizilgen tabystar týraly habardar etý, jas saılaýshylardyń demokratııalyq qundylyqtarǵa peıildiligin qalyptastyrý.
