El óńirlerinde órtterde 5 adam mert boldy
ASTANA. 17 qańtar. QazAqparat - 16 qańtar kúni saǵat 08.46-da Jambyl oblysy Jýaly aýdany, B. Momyshuly aýylynda ornalasqan jekemenshik turǵyn úıden órt shyqty.
Órt saǵat 09.15-te sóndirildi. Tilsiz jaýdy aýyzdyqtaýǵa QR TJM Jambyl oblysy boıynsha TJD órtke qarsy qyzmetiniń 4 adamy men 1 tehnıkasy jumyldyryldy. Jalyn sharpyǵan aýmaq 15 sharshy metrdi qurady. Órt ornynda eki adamnyń máıitteri tabyldy.
Keshe saǵat 23.35-te Almaty oblysynyń Tekeli qalasynda Bóltirik sheshen kóshesiniń boıyndaǵy bir qabatty 4 páterli turǵyn úıdiń páterleriniń birinde órt bastaldy. Jalyn QR TJM Almaty oblysy boıynsha TJD órtke qarsy qyzmetiniń 3 adamy men 1 tehnıkasynyń kúshimen 00.25-te sóndirildi. Úsh sharshy metr aýmaqty sharpyǵan órt ornynda 51 jastaǵy áıeldiń máıiti tabyldy.
Sondaı-aq túngi saǵat úsh shamasynda Aqmola oblysyna qarasty Makınsk qalasyndaǵy páterden órt shyqty. Jalyn 15 mınýtta sóndirildi, qutqarýshylar eki adamnyń máıitterin tapty.
Tilsiz jaýdy aýyzdyqtaýǵa QR TJM Aqmola oblysy boıynsha TJD órtke qarsy qyzmetiniń 4 adamy men 1 tehnıkasy jumyldyryldy. Jalyn bir sharshy metr aýmaqqa tarady.
