El óńiriniń stýdentteri ekstremızmge qarsy konkýrsqa qatysty

NUR-SULTAN. QazAqparat - Elordada QR Aqparat jáne qoǵamdyq damý mınıstrliginiń qoldaýymen uıymdastyrylǵan ekstremızmge qarsy is-qımyl jónindegi «Teambuilding» respýblıkalyq semınary ótti. Onyń barysynda Qazaqstannyń 5 óńiriniń ekstremızmge qarsy jastar qozǵalysy kóshbasshylary arasyndaǵy baıqaýdyń qorytyndysy shyǵaryldy, dep habarlaıdy QazAqparat tilshisi.

Atalǵan semınarda Mahabbat Esen, Dıana Esenova, Órken Kenjebek, ıAkov Federov syndy bilikti spıkerler destrýktıvti mazmundaǵy aqparattardy anyqtaý, synı oılaı bilýdi damytý, BAQ-ta medıa materıal jasap, ilgeriletý boıynsha dáris oqydy.

QR Aqparat jáne qoǵamdyq damý mınıstrliginiń Din isteri komıteti tóraǵasynyń orynbasary Baýyrjan Bákirov te konkýrstyń jas qatysýshylar aldynda sóz sóıledi.

«Qazirgi ýaqytta qoǵamda jastardyń belsendiligi artyp keledi jáne bul - qýantarlyq jaıt. Bul belsendilikti durys arnaǵa baǵyttaý bizdiń paryzymyz. Óıtkeni biz «Jastar bizdiń bolashaǵymyz» dep jıi aıtamyz. Eger de bul, shynymen dál solaı bolsa, onda bolashaǵymyzǵa senim artaıyq», - dedi Baýyrjan Bákirov.

Shara aıasynda «Áleýmettik jelilerdegi úzdik post-jarııalanym»; «Dinı ekstremızmge qarsy áreket boıynsha úzdik kreatıvti aktsııa»; «Eriktiler qozǵalysynyń úzdik uıymdastyrýshysy» syndy atalymdar boıynsha konkýrs qorytyndysy shyǵaryldy.

Konkýrstyń úsh atalymy boıynsha almatylyq Laýla Jumaǵalıeva, oraldyq Danat Ǵumarov, shymkenttik Dınara Asaýbaı jeńimpaz dep tanyldy. Olarǵa baǵaly syılyqtar men alǵys hattar tabystaldy. Jastar ektremızmge qarsy is-qımylda tamasha nátıje kórsetip, belsendi azamattyq ustanymdaryn tanyta bildi.

«Osynaý sharany uıymdastyrǵany jáne jastarǵa aıryqsha nazar aýdarǵany úshin QR Aqparat jáne qoǵamdyq damý mınıstrligine shyn júrekten rızashylyǵymdy bildiremin. Mundaı baıqaýlar men semınarlar jastarǵa durys ómirlik baǵyt beredi. Osy baıqaýǵa qatysýymnyń arqasynda kóptegen dos taptym jáne barlyǵyna sáttilik tileımin», - dedi jeńimpazdardyń biri Laýla Jumaǵalıeva.

Esterińizge sala ketsek, buǵan deıin joba aıasynda Almaty, Shymkent, Qaraǵandy, Aqtóbe jáne Oral qalalarynda eki kúndik oqytý semınary ótti. Oǵan joǵary oqý oryndarynyń stýdentteri men magıstranttary, orta-arnaıy oqý oryndarynyń oqýshylary, aımaqtyq jastar jáne volonterlik uıymdardyń ókilderi, jalpy 300-den astam adam qatysty.

Dinı ekstremızmniń aldyn alýda jastardyń rólin eleýsiz qaldyrýǵa bolmaıdy. Jastar arasynda ekstremızmge qarsy sanany qalyptastyrý, dinı ekstremızmge qarsy kúreste quqyqtyq jáne azamattyq jaýapkershilik deńgeıin arttyrý maqsatynda Aqparat jáne qoǵamdyq damý mınıstrliginiń tapsyrysymen «Ekstremızmsiz Qazaqstan» jobasy júzege asyrylýda. Joba el jastarynyń ekstremıstik jáne destrýktıvti dinı aǵymdarǵa tartylý qaýpin azaıtý maqsatynda ekstremızmge qarsy jastar qozǵalysynyń qyzmetin uıymdastyrýdy qarastyrady.