El ómirindegi tarıhı ózgeristerdiń barlyǵy halyqtyń kóz aldynda bolyp jatyr - Memleket basshysy

ASTANA. KAZINFORM – Konstıtýtsııany birneshe urpaqtar arasyndaǵy qasterli kelisim dep ataýǵa bolady. Bul týraly Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.

v
Foto: Aqorda

- Búgin men Memleket basshysy retinde Qazaqstan halqyna dástúrli Joldaýymdy jarııalaımyn. Bul Joldaýdyń máni de, mazmuny da aıryqsha. 25 qazanda ulttyq merekemiz – Respýblıka kúnin atap óttik. Osy kúni Egemendik týraly deklaratsııa qabyldandy. Biz derbes el bolý jolynda batyl qadam jasadyq. Kóp uzamaı Táýelsizdik týyn bıikke kóterip, eldigimizdiń irgesin bekittik. Mine, bıyl qasıetti Táýelsizdigimizge 35 jyl tolyp jatyr. Bul tarıhı mejeniń ult shejiresinde alatyn orny bólek, - dedi Prezıdent.

Memleket basshysy bıyl naýryz aıynda halqymyz memlekettigimizdiń negizgi tiregin – Konstıtýtsııamyzdy qabyldaǵanyn atap ótti.

- Bul tutas elimiz úshin tarıhı mán-maǵynasy tereń oqıǵa boldy. Konstıtýtsııany birneshe urpaqtar arasyndaǵy qasterli kelisim dep ataýǵa bolady. Óıtkeni Konstıtýtsııada Qazaqstannyń qazirgi bitim-bolmysy men bolashaqtaǵy beınesi naqty aıqyndaldy. Azamattarymyz jappaı qoldaǵan Konstıtýtsııa 1 shildede zańdy kúshine enip, elimizdiń saıası júıesiniń túbegeıli jańǵyrýyna, jańa bılik ınstıtýttarynyń qurylýyna úlken serpilis berdi. Jurtymyz jarqyn bolashaqqa bastaıtyn aýqymdy jumysty atqarýǵa belsendi túrde kiristi. El ómirindegi tarıhı ózgeristerdiń barlyǵy halyqtyń kóz aldynda bolyp jatyr. Bul másele asa mańyzdy bolsa da, kóp sóz aıtýdyń qajeti joq dep oılaımyn, - dedi Memleket basshysy.

Іs-sharaǵa Quryltaı depýtattary, Úkimettiń jáne Qazaqstan Halyq Keńesiniń músheleri, ortalyq jáne jergilikti memlekettik organdardyń basshylary, qoǵam ókilderi men eńbekkerler qatysyp otyr.