«El-Nıno» qubylysynyń qýaty: Eýropada alda qandaı qys kútip tur
ASTANA. KAZINFORM – Arktıkadaǵy polıarlyq quıynnyń ádetten tys erte álsireýi jáne Tynyq muhıtyndaǵy qýatty «El-Nıno» qubylysy Eýropadaǵy aldaǵy qysqa áser etýi múmkin. Alaıda ázirge sınoptıkter qystyń jumsaq bolatynyn boljap otyr, dep habarlaıdy Euronews.
Polıarlyq quıyn – Arktıka ústinde qalyptasatyn kúshti aýa aǵyndarynyń júıesi. Ádette ol sýyq aýany soltústik aımaqta ustap turady. Biraq bıyl qarasha aıynyń basynda bul quıynnyń álsireýi múmkin. Ǵalymdardyń málimetinshe, mundaı qubylys 1958 jyldan beri osy kezeńde alǵash ret baıqalýy yqtımal.
Eger polıarlyq quıyn ekige bólinse, onyń saldary Eýropada eki-alty aptadan keıin sezilýi múmkin. Degenmen bul birden qatty aıaz bastalady degendi bildirmeıdi.
Sonymen qatar Tynyq muhıtynda «El-Nıno» qubylysy kúsheıip keledi. Qazan aıynda muhıttyń baqylaý aımaǵyndaǵy sý temperatýrasy ortasha kórsetkishten 3,3 gradýsqa joǵary bolǵan. Jeltoqsanǵa qaraı bul aıyrmashylyq 3,8 gradýsqa jetýi múmkin. Bul 2015–2016 jyldardaǵy burynǵy rekordtan da joǵary kórsetkish bolmaq.
Meteorologtardyń boljamynsha, qarashada Eýropada aýa raıy ádettegiden jyly bolady. Jalpy, ázirge qys mezgiliniń jumsaq ótýi yqtımal stsenarıı sanalady. Soǵan qaramastan, qurlyqta uzaqqa sozylatyn sýyq kezeńder men qar jaýýy da joqqa shyǵarylmaıdy.
Ǵalymdar aldaǵy aptalarda polıarlyq quıynnyń qaıta qalpyna kelý-kelmeýi aýa raıyn boljaýda sheshýshi ról atqaratynyn aıtady. Al Rojdestvo merekesinde qar jaýatynyn ázirge senimdi boljaý múmkin emes.
Eske sala ketsek, buǵan deıin Qytaıdyń jasandy ıntellektini qaýipti aýa raıyn boljaýǵa úıretkenin habarladyq.
