El-Nıno fenomeni: Sarapshylar álem boıynsha aptap ystyq pen sý tasqyny bolatynyn boljaıdy
ASTANA.KAZINFORM - Ekvatorlyq Tynyq muhıtyndaǵy jerústi sýlarynyń jylynýyna ákep soǵatyn El-Nıno qubylysy 2026 jyldyń sońyna deıin damýy múmkin. Sarapshylar búkil álemde sý tasqyny, qurǵaqshylyq jáne rekordtyq joǵary temperatýra bolýy múmkin ekenin eskertedi, dep habarlaıdy BILD.
El-Nıno - Tynyq muhıtynyń ortalyq jáne shyǵys bóligindegi jerústi sýlarynyń merzimdi túrde jylynýy, ol ár 2-7 jyl saıyn bolyp turady jáne planeta klımatyna aıtarlyqtaı áser etedi. Qazirgi ýaqytta Eýropalyq ortasha dıapazondy aýa raıyn boljaý ortalyǵynyń (ECMWF) derekteri bul qubylystyń 2026 jyldyń sońyna deıin damýy múmkin ekenin kórsetedi.
Meteorolog Domınık ıÝng «El-Nıno kezinde ekstremaldy aýa raıy oqıǵalarymen - qurǵaqshylyq, sý tasqyny jáne aptap ystyqpen sıpattalady» dep atap ótti. 10-15 jylda bir ret bolatyn «sýper El-Nıno» kezinde Tynyq muhıtynyń temperatýrasy eki gradýstan astam Tselsııge kóterilýi múmkin, bul búkil álemge áserin kúsheıtedi».
Klımatolog doktor Karsten Brandt oqıǵa shyńy 2026 jyldyń qarashasynda, al eń joǵary áseri 2027 jyldyń qańtarynda bolýy múmkin ekenin aıtty.
Onyń sózinshe, El-Nıno jahandyq aýa raıynyń ózgerýimen, ekonomıkalyq zalal keltiretin tabıǵı apattarmen sıpattalady.
Onyń saldary aýqymdy bolýy múmkin:
Soltústik Amerıka: Amerıka Qurama Shtattarynyń batysynda rekordtyq ystyq jaz, qurǵaqshylyq pen orman órtteriniń qaýpi artýy múmkin.
Ońtústik-Shyǵys Azııa: Fılıppın, Qytaı jáne Japonııa taıfýndarmen betpe-bet keledi.
Aýstralııa, Indonezııa, Shyǵys Afrıka jáne Karıb teńizi: aptap ystyq jáne qurǵaqshylyq.
Perý jáne Ekvador: nóser jaýyn-shashyn jáne sý tasqyny.
Ońtústik Amerıkanyń, Afrıkanyń jáne Taıaý Shyǵystyń tropıkalyq aımaqtary: joǵary ylǵaldylyq jáne aptap ystyq.
Sarapshylar El-Nınonyń búkil álem boıynsha atmosferalyq aǵyndarǵa, ózgermeli jelderge, jaýyn-shashynǵa jáne temperatýraǵa áser etetinin atap ótedi.
Aıta keteıik, buǵan deıin Qazaqstannyń qaı óńirlerinde kóktemgi sý tasqyny qaýpi joǵary ekendigi týraly Qazgıdromet boljamyn usynǵanbyz.
