El-Nıno Dúnıejúzilik muhıttyń rekordtyq deńgeıde jylynýyna sebep boldy
ASTANA.KAZINFORM - 2026 jylǵy qyrkúıekte Dúnıejúzilik muhıt betiniń ortasha temperatýrasy Tselsıı boıynsha 21,05 gradýsqa jetip, osy aı úshin jańa rekord ornatty, dep habarlaıdy BELTA.
BELTA-nyń France 24 basylymyna silteme jasap habarlaýynsha, tıisti derekterdi Eýropanyń Copernicus klımattyq monıtorıng qyzmeti usynǵan.
Qyrkúıekte Dúnıejúzilik muhıt betiniń ortasha temperatýrasy Tselsıı boıynsha 21,05 gradýs boldy. Bul 2023 jyly tirkelgen aldyńǵy qyrkúıek rekordynan joǵary. Sol kezde kórsetkish 20,92 gradýsqa jetken edi.
Meteorologtar rekordtyq jylynýdyń negizgi sebebi retinde 2026 jyly qarqyndylyǵy joǵary bolǵan El-Nıno tabıǵı klımattyq qubylysynyń kúsheıýin ataıdy.
Sınoptıkter birneshe aıdan beri bıylǵy El-Nıno baqylaý tarıhyndaǵy eń kúshti qubylysqa aınalýy múmkin ekenin eskertip keledi.
Copernicus baǵalaýynsha, qyrkúıektegi kórsetkishter qubylystyń sharyqtaý shegine áli jetpegenine qaramastan, El-Nınonyń asa kúshti ekenin kórsetedi.
El-Nıno Tynyq muhıtynyń ekvatorlyq bóligindegi jerústi sýlary temperatýrasynyń joǵarylaýymen baılanysty jáne álemniń ártúrli óńirlerindegi aýa raıyna áser etedi. Bul qubylys qurǵaqshylyq pen sý tasqyny qaýpin arttyryp, antropogendik jahandyq jylynýdyń áserin kúsheıtýi múmkin.
Buǵan deıin El-Nıno klımattyq qubylysy kúsheıe beretini jáne boljam boıynsha 2026 jylǵy jeltoqsanda sharyqtaý shegine jetetini habarlanǵan bolatyn.
