El-Nıno 2027 jylǵa deıin jalǵasýy múmkin
ASTANA. KAZINFORM – El-Nıno klımattyq qubylysy aldaǵy ýaqytta da kúsheıip, boljam boıynsha 2026 jyldyń jeltoqsanynda sharyqtaý shegine jetedi, dep habarlaıdy Kazinform BUU jańalyqtaryna silteme jasap.
El-Nıno 1950 jyldan bergi eń qýatty klımattyq qubylystardyń birine aınalýy múmkin. Onyń áserinen álemniń kóptegen óńirinde aýa temperatýrasy ózgerip, jaýyn-shashynnyń jaýý tártibi buzylady.
Dúnıejúzilik meteorologııalyq uıymnyń (DMU) jańa boljamy boıynsha, El-Nıno qubylysy 2027 jyldyń aqpanyna deıin jalǵasady deýge tolyq negiz bar. 2026 jyldyń qazan-jeltoqsan aılarynda Tynyq muhıtynyń tropıktik beldeýindegi ortalyq jáne shyǵys bólikterinde teńiz betiniń temperatýrasy rekordtyq deńgeıge kóterilýi múmkin.
— El-Nıno tolyq qalyptasyp, qarqyny údeı tústi. Dúnıejúzilik meteorologııalyq uıymnyń boljamyna sáıkes, bul qubylys 2027 jylǵy aqpanǵa deıin saqtalady. Sondaı-aq ol 1950 jyldan bergi eń kúshti El-Nıno kezeńderiniń birine aınalady, – dedi uıymnyń bas hatshysy Seleste Saýlo.
Aptap ystyq, qurǵaqshylyq pen sý tasqyny qaýpi
Dúnıejúzilik meteorologııalyq uıymnyń boljamynsha, qazan-jeltoqsan aılarynda álemniń kóptegen óńirinde aýa temperatýrasy ortasha deńgeıden joǵary bolady. Sonymen qatar El-Nınonyń kúshti kezeńderine tán jaýyn-shashynnyń taralý ózgeristeri baıqalyp, keı aımaqtarda qurǵaqshylyq, al endi birinde sý tasqyny qaýpi údeýi múmkin.
Keı óńirlerde qurǵaqshylyq qaýpi artsa, basqa aımaqtarda nóser jaýyn men sý tasqyny jıileýi múmkin. Atap aıtqanda, Ortalyq Azııanyń, Shyǵys Azııanyń keı bólikterinde, Arabııa túbeginiń soltústiginde, Afrıka aımaǵynda, sondaı-aq Soltústik jáne Ońtústik Amerıkanyń jekelegen óńirlerinde jaýyn-shashyn ádettegiden mol jaýady.
Al Úndistan túbeginde, Ortalyq Amerıkanyń ońtústiginde, Karıb alabynyń keı bólikterinde jáne Ońtústik Amerıkanyń soltústik-batysynda jaýyn-shashyn mólsheri ortasha deńgeıden tómen bolýy múmkin.
Degenmen bul boljam álemniń barlyq óńirinde kún saıyn aýa temperatýrasy ádettegiden joǵary bolady degendi bildirmeıdi. Ol tek aldaǵy maýsymda belgili bir klımattyq jaǵdaılardyń qalyptasý yqtımaldyǵy artqanyn kórsetedi.
El-Nıno álemdik klımatqa qalaı áser etedi
Dúnıejúzilik meteorologııalyq uıym basshysynyń aıtýynsha, El-Nıno qosymsha jylý óndirmeıdi, kerisinshe, muhıtta jınalǵan jylýdyń atmosferaǵa bólinýine yqpal etedi. Sondyqtan bul qubylys qatty kúsheıgen kezeńderde jer sharyndaǵy ortasha temperatýra da rekordtyq deńgeıge kóteriledi.
Aýa raıyna Úndi muhıtyndaǵy klımattyq terbelistiń oń kezeńi de yqpal etedi. Bul qubylys muhıt alabyndaǵy jaýyn-shashynnyń taralý sıpatyn ózgertedi. Boljam boıynsha, ol qazan aıynda sharyqtaý shegine jetip, keıin birtindep álsireıdi.
Dúnıejúzilik meteorologııalyq uıymnyń boljamy spýtnıkterden, muhıttaǵy qalqymaly ólsheý quraldarynan jáne radıozondtardan alynǵan derekterdi paıdalanatyn 13 ulttyq jáne halyqaralyq klımat ortalyǵynyń málimetterine sáıkestendirilgen.
Uıym El-Nıno qubylysynyń saldaryna aldyn ala daıyndalý úshin klımattyq boljamdardy ulttyq meteorologııalyq qyzmetterge, memlekettik organdar men gýmanıtarlyq uıymdarǵa turaqty túrde usynyp keledi.
Buǵan deıin Qazaqstan 100 myń gektar jasandy orman qurý jobasyn bastaıtynyn habarlaǵan edik.
