El-Nıno tabıǵat qubylysy álemde 60 mln adamǵa zalal keltiredi
ASTANA. QazAqparat - Dúnıejúzilik densaýlyq saqtaý uıymy (DDSU) El-Nıno tabıǵat qubylysy saldarynan adamzat densaýlyǵyna tónetin qaýip-qateri arta túsedi dep eskertedi.
El-Nıno klımattyq qubylysy degenimiz - Tynyq muhıttyń shyǵys aýdandaryndaǵy sý betiniń birshama jylynýy, shamamen Farengeıt boıynsha 1-3 gradýs. Muhıt sýynyń jylynýy bir jerlerde qurǵaqshylyqqa ákelip soqtyrsa, bir aımaqtarda kerisinshe tolassyz jańbyr jaýdyrady.
«El-Nıno Efıopııadan Gaıtıge deıin jáne Papýa-Jańa Gvıneıaǵa qandaı zalal keltirgenin kórip otyrmyz. Osy qubylystyń densaýlyq salasyna keri saldary 2016 jyly seziledi», - dep málimdedi DDSU Tótenshe jaǵdaılar jáne gýmanıtarlyq sharalar is-qımyly departamentiniń dırektory Rıchard Brennan.
BUU-nyń esebi boıynsha, El-Nıno qubylysy Shyǵys jáne Ońtústik Afrıka, Tynyq muhıt araldary, Ońtústik-Shyǵys Azııa jáne Ortalyq Amerıkada qurǵaqshylyqqa, sý tasqynyna, tolassyz nóserge ákelip soqtyryp, ınfektsııalyq aýrýlardyń órshýine, sý jetispeýshiligine, densaýlyq saqtaý salasyndaǵy qaterlerge uryndyrady.
BUU-nyń keltirgen derekterinde, jyl saıyn osy qubylystan damýshy elderdegi 60 mln adam zardap shegedi. Búgingi tańda El-Nıno qubylysynan zardap shekken jeti memleket halyqaralyq qaýymdastyqtan qarjylyq kómek kórsetýin surap otyr. Mamandar Efıopııa, Lesoto, Kenııa, Papýa-Jańa Gvıneıa, Somalı, Tanzanııa jáne Ýgandadaǵy densaýlyq saqtaý salasyna qoldaý kórsetýge 76 mln qajet ekendigin eseptep shyǵarǵan.
