El nazaryn aýdarǵysy keldi – Tóreǵalı týraly otandyq juldyzdar ne deıdi
Eń aldymen ánshi Móldir Áýelbekova Tóreǵalı týraly ún qatty.
«Árıne, durys dep aıta almaımyn. Al jalpy aıtarym, Tóresh pen onyń otbasy – jaqsy adamdar. Ol da bir ananyń balasy, ul-qyzdyń ákesi. Bir bilerim, onyń basynda da ishten tynyp, syr bildirmeı júrgen synaqtary bar. Keıbireýler jelige aýyr sóz jazarda oılansa eken. Anasyna óte aýyr ǵoı, analar jylamasynshy», - dep jazdy Móldir Áýelbekova Instagram jelisinde.
Tanymal aktrısa Juldyz Ábdikárimova el nazary órtten daýǵa aýysty dep qynjylýda.
«Ańǵalmyz, tez aldanamyz. 15 marqumnyń topyraǵy da sýyp úlgermedi ǵoı. 60 myń gektar orman kúlge aınalyp áli dymqyp jatyr. El nazary bir sátte basqa shýǵa aýa ketti. Adamnyń basy Allanyń doby emes pe? Bireýdiń shalys basqan sátinde nege ǵaıbatqa daıyn otyramyz? Zań buzǵandardy jazalaý – quzyrlylardyń isi. Jyǵylǵanǵa judyryq bolmaı, sabyrlyq tanytaıyqshy. Alda kimdi ne kútip turǵanyn kim bilgen? Doǵaraıyqshy», - dep jazdy aktrısa.
Ánshi Merýert Túsipbaeva da dál sondaı pikirde.
«Keı adamdar ártisti ustap, basty taqyrypty japqysy keledi. Saılaý kezinde – Erkeniń toıyn jyrlap, órttiń sońynda – Tóreni ustap… Jaqsy amal, negizi», - deıdi M. Túsipbaeva.
Sonymen birge, ánshi Qýandyq Rahym áriptesine qoldaý kórsetti.
«Pendeniń qashan da túp-túzý shyqpaıdy esebi, sodan soń týady jala men ósegi. Alla qalasa, sý da janady, ot ta óshedi. Alla qalasa qıyn kúrmeýdiń túıinin sheshedi. Aqtap alyp jatqan joqpyn, biraq Alla endi mundaı synaq bermesin», - dedi ol.
Eske salsaq, Almatyda esirtkige masaıǵan kólik júrgizýshi polıtseılerge boı bermeı, oqıǵaǵa ornynan qashpaq bolǵany habarlanǵan edi. Patrýldik polıtsııa qyzmetkerleri júrgizýshiniń ustady jáne medıtsınalyq saraptama nátıjesinde onyń esirtkige mas ekendigi belgili boldy.
Almaty qalalyq sotynyń málimetinshe, esirtkige masaıǵan kólik júrgizýshi ákimshilik jaýapqa tartyldy. Ol 20 táýlikke qamaýǵa alynyp, 7 jylǵa kólik júrgizý quqyǵynan aıryldy. Sot otyrysynda quqyq buzýshy is materıaldarynda baıandalǵan faktilerdi rastap, ókinetinin aıtqan.
Aıta ketsek, pablıkter resmı aqparatta «A. esimdi azamat» dep berilgen kólik júrgizýshiniń Tóreǵalı Tóráli (Alıhanov – red.) ekenin jappaı jazdy.
