«El nannan tapshylyq kórmeıdi» - respýblıkalyq basylymdarǵa sholý

***

«Egemen Qazaqstan» gazetiniń búgingi nómirinde Memleket basshysy Nursultan Nazarbaevtyń aǵymdaǵy jylǵy jeltoqsannyń 1-2-si kúnderi Astanada EQYU Sammıtin ótkizý týraly sheshim qabyldanýyna baılanysty málimdemesi jaryq kórdi. Onda «Eýropadaǵy qaýipsizdik jáne yntymaqtastyq uıymyna qatysýshy memleketterdiń Syrtqy ister mınıstrleri keńesi 3 tamyzda tarıhı sheshim qabyldady. Múshe elderdiń ortaq uıǵarymy boıynsha osy jyldyń 1-2 jeltoqsan kúnderi Astanada mártebeli uıymnyń Sammıti ótedi. bul tarıhı sheshim - qazaqstandyq tolaıym tabystardyń abyroıly aıǵaǵy! Búginde Qazaqstan ǵalamdyq qaýipsizdiktiń kepiline, beıbitshiliktiń berekeli beldeýine aınaldy. Tórtkúl dúnıege tórelik aıtqan Qazaq eli Azııa jáne TMD memleketteri arasynda tuńǵysh ret bedeldi uıymnyń Sammıtin ótkizedi. Qazaq eli buryn-sońdy mundaı bıikke jetken emes», delingen. Sonymen qatar Elbasy málimdemesin «Alash aınasy», «Aıqyn», «Kazastanskaıa pravda» gazetterinen de oqýǵa bolady.

«Keshe Memleket basshysy Nursultan Nazarbaev aýyl sharýashylyqty sanalatyn Aqmola oblysynyń Tselınograd aýdanynda jumys saparymen bolyp, jergilikti jerdegi birqatar uıymdar men kásiporyndarda boldy. Osyndaǵy iri ári kópsalaly aýylsharýashylyq qurylymy sanalatyn «Aqmola-Fenıks» AQ-nyń jumysymen jaqyn tanysty», dep jazady «Egemen Qazaqstan» gazeti «El nannan tapshylyq kórmeıdi» degen taqyryppen jaryq kórgen maqalasynda. Basylymnyń baıandaýynsha, aldymen Memleket basshysy jalpy aýdany 19,6 myń gektardy quraıtyn dándi jáne burshaq daqyldary egistigin aralap kórgen. Sodan keıin Elbasy astyqty bastapqy satyda óńdeıtin mehanıkalandyrylǵan qyrmanda bolyp, munda jınalǵan «Aqmola-Fenıks» AQ-nyń jumysshylarymen kezdesý ótkizdi. Kezdesý barysynda N.Nazarbaev bıylǵy aýa raıynyń qolaısyzdyǵyna qaramastan negizgi astyqty óńirlerdiń eginshileri ortasha egin túsimine qol jetkizetinin aıtty. Ásirese egin túsimine Qostanaı, Soltústik Qazaqstan jáne Aqmola oblystarynda qol jetkiziletin bolsa, al Batys Qazaqstan men Aqtóbe oblystarynda aýa raıynyń aptapty bolýyna baılanysty egin bitik shyqpaýy múmkin.

Qazaqstan Respýblıkasynyń Premer-Mınıstri Kárim Másimov Saýd Arabııasy Koroldiginiń Qazaqstan Respýblıkasyndaǵy Tótenshe jáne Ókiletti Elshisi Hısham Zaraamen kezdesti. Bul aqparatty «Egemen Qazaqstan» gazeti Premer-Mınıstrdiń baspasóz qyzmetine silteme jasap habarlap otyr. Premer-Mınıstr dıplomatııalyq mıssııasynyń merzimi aıaqtalyp kele jatqan elshige eki el arasyndaǵy saýda-ekonomıkalyq qarym-qatynastardy damytýǵa qosqan úlesi úshin alǵysyn bildirdi. Óz kezeginde H.Zaraa eki jaqty qarym-qatynastardy damytý isinde kórsetken kómegi úshin Qazaqstan basshylyǵyna óziniń rızashylyq sezimin jetkizdi. Kezdesý qorytyndysynda taraptar Qazaqstan men Saýd Arabııasy Koroldigi arasyndaǵy qyzmettestiktiń odan ári de yrǵaqty damı beretinine ózderiniń senimdi ekendikterin bildirdi.

***

Jyl bastalǵaly beri halqy birneshe ret kóterilip, tártipsizdikter jaqynda ǵana eptep saıabyrsyǵan kórshiles Qyrǵyz elinde taǵy bir kóterilistiń sheti qyltııa bastaǵan syńaıly. «Alash aınasy» gazetiniń jazýynsha, kshe osy eldegi belgili oppozıtsıoner, 2005 jyly «memlekettik tóńkeris jasaýǵa jáne bılikti tartyp alýǵa nıettendi» degen aıyppen tergeýde júrgen «Meken Týý» qozǵalysynyń jetekshisi Ýrmat Baryktabasovtyń 2000-ǵa jýyq jaqtasy Bishkektiń ortalyǵyndaǵy parlament ǵımaratynyń janynda ýaqytsha úkimettiń otstavkaǵa ketýin talap etip, ereýilge shyqqan. Bul týrasynda osy basylymnyń juma kúngi nómirinde jarııalanǵan «Endi ystyqkóldikterdiń «qyzýy kóterildi» degen taqyrypta egjeı-tegjeıli baıandalǵan.

«Alash aınasy» gazeti «jaqynda elimizdegi bir úkimettik emes uıym ókilderi áıelderge arnalǵan trenıng ótkizdi. Shara turmystyq zorlyq-zombylyqtyń aldyn alý taqyrybyna arnaldy. Áıelderdiń jappaı qyzyǵýshylyǵyn týdyrǵanymen, bul trenıng biz úshin, kerisinshe, otbasyn shaıqaltýdyń joldaryn úıretetin jıynǵa uqsap ketti», dep jaza kele, «Ulttyq múddege qyzmet etpeıtin keıbir qoǵamdyq uıymdardyń qyzmetin shekteý qajet pe?» degen saýaldy mamandar nazaryna usynǵan. Atalǵan saýalǵa bergen mamandar jaýabyn oqyp-bilgińiz kelse, basylymnyń búgingi nómirin jiberip almańyz.

***

«Memleket basshysy Nursultan Nazarbaev Reseı Federatsııasynyń Prezıdenti Dmıtrıı Medvedevpen telefon arqyly sóılesti», dep jazady «Aıqyn» gazeti. Reseı aýmaǵyndaǵy aýqymdy órt saldarynan týyndaǵan kúrdeli ahýalǵa baılanysty máseleler talqylandy. Nursultan Nazarbaev Reseı elinde oryn alǵan tabıǵı apattar saldaryn joıýda Qazaqstannyń qajetti kómek jasaýǵa daıyn ekenin atap ótti. Memleket basshylary Ujymdyq Qaýipsizdik Sharty Uıymynyń Erevanda ótetin sammıtine, sonymen qatar Óskemende ótetin Qazaqstan men Reseı arasyndaǵy Óńiraralyq yntymaqtastyq forýmyna daıyndyqtyń máselelerin de talqylady.

«Qastandyq qoldan jasaldy ma?». «Aıqyn» gazetinde osy taqyryppen basylǵan maqalada Iran prezıdentine qastandyq jasalǵandyǵy aıtylǵan. «Biraq qudaıǵa shúkir, Mahmýd Ahmadınejad din-aman. Qaskóıdiń shirene turyp laqtyrǵan qoldan jasalǵan bombasyn qudaı qaqty ma, áıteýir alysqa jaryldy. Birneshe adam jaraqat alǵanymen, eshkim aıtarlyqtaı zardap shekken joq», dep jazady basylym. Oqıǵa sársenbi kúni Hamadan shaharynda oryn alǵan. Óz jaqtastary aldyna sóz sóıleýge kele jatqan prezıdent kortejine belgisiz bireý bomba laqtyrǵan. Ol birden qolǵa tústi. Biraq kim, ne adam ekeni ázirge ashyq aıtylmaýda. Bombanyń jarylǵanyna eleń etpegen Iran basshysy kópshiliktiń aldyna túk bolmaǵandaı sózin jalǵastyrǵan. Osy oqıǵaǵa qatysty túrli boljamdardy oqyp bilgińiz kelse, basylymnyń juma kúngi nómirine nazar aýdaryńyz.

«Izvestııa-Kazahstan» gazetinde «Vse pod kontrolem» degen taqyryppen jaryq kórgen maqalada Aqordada Memleket basshysy Nursultan Nazarbaevtyń basshylyǵymen azamattardyń quqyqtaryn qorǵaýdyń ózekti máseleleri boıynsha keńes týrasynda jazylǵan. Keńes barysynda úlestik qurylysqa ózderiniń qarjylaryn salǵan azamattardyń problemalaryn sheshýmen, qylmyspen kúrestiń jaı-kúıimen, elde zańdylyq pen quqyq tártibin qamtamasyz etýmen, sondaı-aq kásipkerlik qyzmetindegi azamattardyń quqyqtaryn qorǵaýmen baılanysty máseleler áńgime boldy.