El mýzeılerine kirý quny qansha
ASTANA. KAZINFORM – Qazaqstannyń qalalaryndaǵy memlekettik mýzeılerge kirý qunynda biraz aıyrmashylyq bar. Kazinform tilshisi oblys ortalyǵy men qalalardaǵy memlekettik mýzeıge kirý baǵasyn salystyrdy. Ol úshin mádenıet oshaǵyna tikeleı habarlasyp, eresek adamdarǵa arnalǵan bılet baǵasyn bildi.
Baǵany salystyrǵan kezde eń joǵarysy Almaty qalasyndaǵy Qazaqstan Respýblıkasy Ortalyq memlekettik mýzeıinde tirkeldi. Eresek adamǵa arnalǵan bılet quny – 1 500 teńge. Odan ári Astana qalasyndaǵy Qazaqstan Respýblıkasy Ulttyq mýzeıi, Qaraǵandy oblystyq tarıhı-ólketaný mýzeıi men Oral qalasyndaǵy Batys Qazaqstan oblystyq tarıhı-ólketaný mýzeıi tur. Bılet quny – 1 000 teńge.
Óńirlerdiń basym bóliginde bılet quny – 500 -700 teńge aralyǵynda. Naqtylasaq, Semeı, Taldyqorǵan, Túrkistan, Petropavl, Qyzylorda men Jezqazǵanda 500 teńge, Atyraýda 600 teńge, al Aqtóbede 700 teńge.
Eń qoljetimdi baǵa Tarazdaǵy Jambyl oblystyq tarıhı-ólketaný mýzeıinde. Kirý quny – 250 teńge. G. N. Potanın atyndaǵy Pavlodar oblystyq tarıhı-ólketaný mýzeıinde, Aqtaý qalasyndaǵy Ábish Kekilbaev atyndaǵy Mańǵystaý oblystyq tarıhı-ólketaný mýzeıinde – 300 teńge. Qostanaı oblystyq tarıhı-ólketaný mýzeıinde bul qyzmet tegin.
Elimizde tarıhı-ólketaný mýzeıinen basqa ondaǵan qyzyqty mádenı oshaq bar. Onyń biri – Pavlodardaǵy Naým Shaferdiń mýzeı úıi. Munda kúıtabaqtar kollektsııasy, magnıtafon jabasy, kitap pen mýzykalyq arhıv saqtaýly. Bul elimizdegi iri mýzeılerdiń biri.
Aǵash sheberi ıÝrıı Kostanıantstiń mýzeı úıi tańǵajaıyp orynnyń biri. Negizin qalaǵan burynǵy azamattyq avıatsııa ushqyshy ıÝrıı Kostanıants. Ol úıin mádenı oshaqqa aınaldyrdy. Mýzeı ishinde óz qolynan shyqqan ondaǵan aǵash músin bar. Uly dala tarıhynan syr shertetin mýzeıde qazaq handary, batyrlarynyń músini saqtaýly, tarıhı oqıǵalardy da beınelengen. Avtordyń ózi mýzeıdi «óner teatry» dep ataıdy. Úı ishindegi ár buıym, mýzyka men jaryq sheber úılesip tur.
Al Yqylas Dúkenuly atyndaǵy mýzykalyq aspaptar mýzeıinde qazaq jáne sheteldiń júzdegen mýzykalyq aspaby saqtaýly. Olardyń kóbi biregeı qundy jádiger.
Arheologııaǵa qyzyǵatyndar «Berel» memlekettik tarıhı-mádenı mýzeı-qoryǵyna barady. Munda saq qorǵanynyń mol murasy, at ábzelderi men altyn buıymdar saqtaýly.
Almaty qalasyndaǵy Ábilhan Qasteev atyndaǵy óner mýzeıi – iri kórkemsýret mýzeı. Qazaqstannyń beıneleý, qoldanbaly óneri men shetel klassıkteriniń týyndylaryn tamashalaýǵa bolady. Ábilhan Qasteevtiń shyǵarmalary saqtaýly.
Qarlag – saıasy qýǵyn-súrgin qurbandaryn este saqtaý mýzeıi. Bul burynǵy Qarlag basqarmasynyń tarıhı ǵımaratynda ornalasqan. Qarlag tutqyndarynyń jeke isi, ekspedıtsııa kezinde tabylǵan eńbek quraldary men turmystyq zattar usynylǵan. Eńbekpen túzeý lageriniń oryndaǵy mýzeıde myńdaǵan eksponat bar.
Baıqońyr ǵarysh aılaǵyndaǵy tarıhı mýzeıi. Munda ǵarysh salasynyń damýy men tarıhı jádigerleri saqtaýly.
«Atameken» etno-memorıaldy kesheni – ashyq aspan astyndaǵy mýzeı. Munda Qazaqstan óńirlerindegi tabıǵı, sáýlet jáne tarıhı eskertkishteriniń shaǵyn kóshirmesi bar.
Buǵan deıin jarty jylda Qazaqstannyń mýzeı-qoryqtaryna 784 adamnyń barǵanyn jazǵan edik.
