Elmıra Sýhanberdıeva: «Mektepke – tirkeý, balabaqshaǵa qabyldaý – kezek boıynsha»
ASTANA. QazAqparat - Astana qalasy Bilim basqarmasynyń basshysy Elmıra Sýhanberdıevaǵa «ashyq jeli» barysynda elordalyqtar kúndelikti qarapaıym suraqtardy ǵana emes, sonymen qatar mekteptegi tamaqtaný, qaýipsiz jol jáne balabaqshadan oryn alý men UBT, 12 synyptyq júıege kóshý sekildi mańyzdy suraqtardy qoıdy. Bul týraly Astana qalasy ákiminiń baspasóz qyzmeti habarlady.
Onda qala turǵyndarynyń qoıǵan birqatar suraqtary men olarǵa qaıtarylǵan jaýaptardy usynamyz.
Roza:
- Mektep ashanalaryndaǵy taǵam dámsiz, s alqyn ári qymbat. Meniń balam 3-synypta oqıdy, osy jyldar júzinde, ókinishke oraı, eshteńe ózgermedi...
- Bastaýysh synyptardyń oqýshylary tolyqtaı tegin tamaqtanýmen qamtamasyz etilgen. Ystyq taǵamdar máziri Astana qalasynyń Tutynýshylardyń quqyqtaryn qorǵaý departamenti jáne Qazaq taǵamtaný akademııasymen maquldanǵan. Oqýshylarǵa arnalǵan taǵamnyń sýyp qalý faktisi sol mekteptegi bala sanynyń kóp bolýyna baılanysty, mysaly, ashanalar dastarhandy úziliske deıin aldyn-ala 15-20 mınýt buryn jasap qoıady. Mektep ashanalarynda osyǵan baılanysty jylytqysh peshter ornatylǵan. Qalaı bolǵanda da, sizdiń eskertpeńizdi qadaǵalaıtyn bolamyz. Osyǵan qosarym, Astananyń barlyq mektepterinde «Mekteptegi sút» atty joba júzege asyrylyp jatyr, ótken jyldan bastap barlyq mektep oqýshylarynyń jumalyq tamaqtaný mázirine Qazaq taǵamtaný akademııasy jáne tamaqtaný máseleleri ınstıtýtynyń maquldaýymen bal tutyný engizilgen.
Oksana:
- Sálemetsiz be, meniń esimim Oksana. Biz jubaıymyz ekeýmiz 2005 jyly neke qıdyq, biraq densaýlyǵyma baılanysty bala kótere almaımyn. Biz bala asyrap alýdy jón sanap otyrmyz. usynovite.kz saıtynan jeti jasar qyz balanyń sýretin kórdik, ol bizge qatty unady. Endi ne isteý qajettigin aıtyńyzshy...
- Sálemetsiz be, Oksana! Bul másele boıynsha Astana qalasy Bilim basqarmasynyń balalardy qorǵaý, asyraý jáne qamqorlyq bólimine habarlasýyńyzǵa bolady. Turǵyndardy qabyldaý kúni - seısenbi jáne beısenbi, saǵ. 14.00-17.00 deıin.
Janar:
- Kóp balaly otbasylar úshin Oqýshylar saraıynda arnaıy sektsııalar men úıirmelerge barý úshin jeńildikter qarastyrylǵan ba?
- Oqýshylar saraılarynda Jarǵyǵa sáıkes, kóp balaly otbasydan shyqqan oqýshylar úshin jeńildikter qarastyrylǵan, qajetti qujattardy kórsetken jaǵdaıda úıirmeler men sektsııalarǵa tegin qatysýǵa bolady.
Asqar Qalıev:
- Byltyr UBT -ny alyp tastaıdy degen áńgimeler kóp aıtyldy. Bıyl testileý qalaı ótkiziledi, burynǵy format boıynsha bola ma?
- Bıylǵy oqý jylynda Ulttyq biryńǵaı testileýdi ótkizý tártibine ózgerister engizilgen joq.
Galına Evgenevna:
- Jalǵyzbasty analar balalardy balabaqshaǵa ornalastyrý úshin jeńildik sanatyndaǵy azamattarǵa jata ma?
- 2012 jylǵy 16 aqpandaǵy «Áskerı qyzmet jáne áskerı qyzmetshilerdiń mártebesi» zańynyń 52 baby 3-tarmaǵyna sáıkes, balalardy kezekten tys balabaqshaǵa ornalastyrý múmkindigi áskerı qyzmetkerlerge, sonymen qatar, óziniń jeńildikke ıe sanatyn dáleldeıtin turǵyndar úshin qarastyrylǵan (QR Úkimetiniń 2014 jylǵy 23 mamyrdaǵy № 538 qaýlysyna sáıkes). Jalǵyzbasty analar joǵaryda atalǵan sanattarǵa jatpaıdy.
Álııa:
- Meniń balam bıyl mektepke barady. Osyǵan deıin balalarymyz 12 jyldyq júıe boıynsha oqıdy dep aıtylǵan. Balam qansha jyl oqıdy - 11, álde 12 jyl ma?
- Jańa oqý jylynda mektepke baratyn balalar burynǵy 11 jyldyq júıe boıynsha oqıdy. Qazirgi kezde qalalyq mektepterde 12 jyldyq oqý júıesine kóshý boıynsha tájirıbeler júrgizilýde. Búgingi tańda 12 jyldyq tájirıbelik synyptar № 3, 18, 38 jáne «Golýboı parýs» mektepterinde ashyldy.
Sholpan:
- Meniń balam 2012 jyly týǵan, bizdiń kezek 17 myńynshy. Kezek jyljyp, 13 myńynshy boldyq. Bizdiń balabaqshaǵa baratyn múmkindigimiz bar ma?
- Bilim basqarmasy balabaqshalarǵa balalardy qabyldaýdy jyl saıyn maýsym aıynda júrgizedi. Bul sharanyń qarsańynda barlyq aqparat qala ákimdiginiń resmı saıtynda jáne buqaralyq aqparat quraldarynda jarııalanady. Balabaqshadaǵy oryndar kezektiń kelýi boıynsha beriledi.
Anar Alpysbaeva:
- Meniń balalarym bıylǵy oqý jylynda № 78 mektep-gımnazııasyna bardy. Atalmysh mekeme shynymen de óte ádemi jáne zamanaýı tehnıkamen jabdyqtalǵan. Biraq meni, mektepke baratyn joldyń qaýipsizdigi alańdatady. Balalar kún saıyn jaıaý júrginshi jolaǵy joq jerden jalǵyz ótýge májbúr. Biz túrli basqarmalarǵa osy shaǵymdarmen habarlasqan edik...
- Bul saýal jyl basynan beri qalalyq Jolaýshylar kóligi jáne avtomobıl joldary basqarmasy men «Esil» aýdanynyń ákimdigine birneshe ret joldanǵan bolatyn. Hattar men fotopikirler osy vedomstvolardyń qaraýynda.
Sáýle Mahanova:
- Meniń balam bıyl birinshi synypqa barady. Úıge jaqyn mektepke baratyn múmkindigimiz bar ma?
- Bala tirkelgen meken-jaıy boıynsha mektepke qabyldanady.
