Elmıra Israfılova aqtalyp shyqty
ASTANA. 31 naýryz. QazAqparat - Byltyr Qazan qalasyndaǵy qalalyq keńestiń aldynda orystildi oqýshylardyń ata-analary mektepte tatar tilin oqytýǵa qarsy pıket uıymdastyrǵan bolatyn, dep habarlaıdy «Abaı-aqparat».
Buny jergilikti TNV telearnasynyń jýrnalısteri kelip túsiredi. Olar tatar jastarynyń «Azatlyq» dep atalatyn uıymynyń jetekshisi Naıl Nabıýllın men depýtat-dramatýrg Týfan Mınnıýllınnen oqıǵa ornynda suhbat alady. Biraq osy kezde «TNV» arnasynyń tilshisi ári júrgizýshi bolyp isteıtin Elmıra Israfılova pıketke shyqqan shovınısterdiń arandatýyna ushyraıdy. Tilshige jónsiz aıyp taqqandardyń aıtýynsha, Elmıra olarǵa «eger áldekimge tatar tili unamasa, Tatarstannan kete berýine bolady» degen kórinedi. Pıketshiler bolsa: «Biz osynda týdyq, ata-babalarymyzdy osynda jatyr, qaıda ketemiz?» dep jaýap qatqan. Alańǵa shyqqan arandatýshylar keıin tilshiniń aýzynan «men tatar tili úshin kez-kelgenniń keńirdegin qııýǵa daıynmyn» degen sózdi estigenderin aıtqan. Osy oqıǵadan keıin olar «Elmıra Israfılovanyń ekstremıstik sıpattaǵy sózderine qarsy» qylmystyq is qozǵaý týraly polıtsııaǵa aryz jazady. Alaıda, jergilikti quqyq qorǵaý organdary tilshiniń sózderinen zańǵa qaıshy keletin ilik tappaı, qylmystyq is qozǵaýdan bas tartqan. Al Israfılovanyń ózi aldyn-ala tergeý barysynda pıketke shyqqandardyń ózine jala japqanyn jetkizgen bolatyn. «Men ondaı sózder aıtqan joqpyn. Daýlaspadym, olardyń maqsatyn ǵana bilgim keldi. Biraq olarǵa meniń suraǵym unamady. Tipti pıketshilerdiń bireýi namysyma tıetin sóz aıtty. Bul sózge jaǵamdy ustap qaıtyp bara jatqanymda olar artymnan ár nárseni aıtyp aıǵaılaýmen boldy» degen edi Elmıra Israfılova.
Degenmen jýrnalıstiń mundaı sózderdi májbúrlikpen aıtqanyn málimdegen Tatar ultshyldary bul iske jumyla kirisip qyzdaryn qorǵap qaldy. Máselen, tatar jastar uıymynyń belsendisi Rýshan Gaıfýllın osy oqıǵaǵa bergen baǵasynda «Ony týǵan tilin qorǵaǵany úshin qaralamaq boldy» degen pikir bildirgen.
